Suspéndese o xuízo contra un acusado de abusar sexualmente da súa sobriña política e da nai desta

O xuízo previsto para este xoves na Audiencia Provincial da Coruña contra un home acusado de abusos sexuais á súa sobriña política e á nai desta quedou suspendido ata nova data pola falta de citación de varios peritos, que non están identificados.

A fiscal, que só exerce acusación polos abusos á máis nova, e as dúas acusacións particulares solicitaron a suspensión da vista debido á ausencia de varios peritos, que non puideron ser identificados e aos que tampouco se lles puideron citar para declarar nesta causa.

Ante este feito, o Tribunal acordou suspender a sesión, sen fixar unha nova data, ata poder identificar os autores dos informes periciais.

En declaracións aos xornalistas á saída da Audiencia, Inés Pequeño, avogada da acusación que representa a filla, explicou que no xuízo “tería que haber citados cinco peritos, que son os autores dos informes relativos á credibilidade da vítimas” e que, non obstante, non o están. “Cremos que é unha proba indispensable para a acusación”, engade.

“A sala vese obrigada a suspender para facer un labor de investigación, para descubrir quen son esas persoas e citalos”, dixo, pola súa banda, o letrado da defensa, Ramón Sierra, que cualificou de “estraña” a circunstancia que motivou a suspensión.

FEITOS

No seu escrito, a Fiscalía, que só acusa polos presuntos abusos sexuais do procesado á súa sobriña política, sostén que “durante o primeiro semestre do ano 2003”, o home, “con ánimo libidinoso” e “aproveitando que a súa sobriña política, menor de idade, pasaba moito tempo no seu domicilio”, tratou de abusar dela ata en dúas ocasións.

Nunha delas, segundo sostén a fiscal, o acusado inmobilizou a moza para, a continuación, “meterlle a man dentro das bragas, ata introducirlle un dedo na vaxina”.

Por estes feitos, a Fiscalía, á que se suma a acusación particular da filla, pide para o acusado unha pena de 16 anos de prisión. A isto engadiríaselle a condena solicitada pola acusación particular que representa a nai da moza, que pide 15 anos por un delito de violación e agresión sexual continuada contra a súa persoa.