Santiago acolle unha marcha contra a violencia machista esta fin de semana

Presentación da concentración

A Plataforma Feminista Galega convocou para este domingo, día 6 de marzo, unha manifestación en Santiago de Compostela para “berrar” en contra da violencia machista e reclamar un cambio nas políticas e medidas que “oprimen” as mulleres, como a discriminación no ámbito laboral.

Baixo o lema ‘Feminismo para avanzar, xuntas na mesma loita’, a marcha, que apoian diversos colectivos e organizacións políticas como o PSdeG, Anova, EU, CC.OO. ou UGT, sairá ás 12,00 horas da estación de tren rumbo á Praza da Quintana para celebrar o Día Internacional da Muller, que ten lugar o 8 de marzo.

“Queremos denunciar o brutal retroceso nos dereitos laborais da muller e ocuparemos a rúa, con rabia, dor e tinguidas de negro, despois de que se producisen máis de 120 asasinatos machistas en España e 13 en Galicia”, sinalou unha das voceiros da plataforma, Pilar Estévez.

Neste sentido, censurou “a privatización e os recortes” nos servizos públicos que “repercuten na muller”, “aos que sobrecargan debido a unha concepción machista da sociedade”. “Pedimos o compromiso da sociedade e os poderes públicos coa loita feminista”, reclamou.

E é que, segundo criticou a exdeputada socialista e membro da plataforma Carmen Cajide parece unha “hipocrisía” que “por un lado se haxan minutos de silencio dende as institucións” mentres, por outro, “se fan recortes”. “Non nos valen minutos de silencio e lacitos na solapa se os acompañamos de recortes, é unha hipocrisía total”, incidiu.

REIVINDICACIÓNS

“É fundamental que todas xuntas alcemos a voz unha vez máis porque queda moito que cumprir”, asegurou Pilar Estévez, que pediu o “rexeitamento unánime” a “un modelo heteropatriarcal da muller laica, privada e doméstica” así como á “invisibilidade da explotación do traballo reprodutivo e dos coidados”.

Fronte a iso, reclamou unha “organización política, social e económica” que “poña no centro ás persoas”, “a reorganización social dos coidados” e “o exercicio dunha sexualidade libre e diversa”. “Queremos que se recoñezan todas familias e modelos de convivencia”, apuntou.

Ademais, indicou na “incuestionabilidade” do dereito das mulleres a “decidir sobre os seus corpos, afectos, sexualidade e maternidades”. “É unha obriga dos poderes públicos garantir o acceso libre, seguro e gratuíto ao aborto, eliminando calquera restrición lexislativa”, sinalou.

“FALTA DE ASISTENCIA EN ABORTOS”

Sobre esta cuestión e preguntada polas denuncias de falta de asistencia a mulleres que abortan en hospitais da Coruña, Estévez acusou as administracións competentes de actuar dun modo “ilegal”.

“Temos que ter garantías, que se cumpra a lei actual, non a están a cumprir e actuaremos duramente con este tema”, asegurou tras explicar que a Plataforma Galega polo Dereito ao Aborto ten prevista unha reunión para o próximo día 12 na que tratará esta cuestión.

“CUESTIÓN DE ESTADO”

Por outra banda, Luisa Ocampo incidiu en que o problema da violencia machista e a discriminación da muller debe ser “unha cuestión de Estado” e ter unha “prioridade absoluta” nas axendas dos poderes públicos. “É evidente que non nos chegan nin os minutos de silencio nin as actitudes de do, nin mirar para outro lado”, asegurou.

Nesta liña, Estévez criticou que a política da Xunta nos últimos anos se caracterizase “polos recortes” en cuestións en servizos como os centros Quérote, os Centros de Información á Muller, e, fronte a iso, se subvencionasen asociacións “antiabortistas”.

Por todo iso a Plataforma sairá á rúa o próximo domingo, 8 de marzo, nunha manifestación que rematará na Praza da Quintana coa actuación de ‘Habelas Hainas’ e a lectura pezas de Laura Bugallo, Rosa Enríquez e Luz Fandiño.