O Partido Popular defende que Feijóo cumpriu coa súa obriga ao avalar a Baltar

O voceiro do PPdeG, Pedro Puy, defendeu que o presidente do seu partido e da Xunta, Alberto Núñez Feijóo, “cumpriu coa súa obriga” ao acudir a avalar o recén reelixido presidente do PP de Ourense, o tamén presidente da Deputación Manuel Baltar, de quen defendeu o seu “magnífico labor” á fronte das dúas ocupacións.

Baltar Blanco está investigado por supostos delitos de suborno e tráfico de influencias a raíz de que unha muller, que tamén foi chamada a declarar en calidade de investigada (antiga figura de imputado), denunciase ao barón popular por supostamente ofrecerlle traballo a cambio de sexo. A denunciante tamén foi incluída no proceso como prexudicado por un suposto delito de acoso sexual atribuíble a Baltar.

“A diferencia do que estamos a ver co resto das formacións políticas galegas, o PP é un partido democrático e o señor Feijóo vai, loxicamente, a todos os congresos provinciais, e é evidente que cumpre coa súa obriga indo a unha clausura no que o 95 por cento das persoas que votaron decidiron apoiar un presidente”, remarcou Pedro Puy, a preguntas dos xornalistas, en relación ás críticas da oposición pola presenza do mandatario autonómico ante a situación do barón popular provincial.

Ao fío diso, o voceiro parlamentario do PPdeG engadiu que Baltar Blanco está a “facer un labor magnífico, tanto á fronte da Deputación, como á fronte do PP de Ourense”. “A partir de aí, se quere preguntamos se a presenza do voceiro dalgún grupo na reunión que tivo o Partido Socialista supón o respaldo ao secretario xeral imputado, ou parvadas desas”, apostilou.

Na súa intervención, Pedro Puy reivindicou que o populares tiveron un congreso “exemplar” no que os afiliados “falaron” e, polo tanto, o presidente do partido “está a disposición da militancia e despois de que haxa un proceso democracia”, como o que “houbo” en Ourense e en Lugo (neste caso con dúas candidatas).

PETICIÓN DE COMPARECENCIA

Os grupos de AGE e BNG pediron este martes, na reunión da xunta de voceiros, a comparecencia do presidente da Xunta, Alberto Núñez Feijóo, para abordar a situación do presidente da Deputación de Ourense, pero foi rexeitada pola maioría dos populares, o voceiro da cal aludiu ao carácter “interesante” de todas as solicitudes que fan neste sentido os grupos da oposición, pero quen xustificou a falta de tempo para incluír todas as súas reclamacións na orde do día da sesión plenaria.

Nas sucesivas roldas de prensa posteriores á xunta de voceiros, os representantes de AGE e de BNG queixáronse desta situación. Así, o vicevoceiro de Alternativa, Antón Sánchez, subliñou que o seu grupo “non lle quere quitar ningún ápice de importancia” ao feito de que Feijóo “abrazase” a Baltar.

“Abrazou a Baltar, a política de enchufes, o uso clientelar das institucións. Avalar isto demostra que o PP non quere rexenerar nada e nunca tivo intención de limpar” as institucións, ha aseverado Antón Sánchez, quen asegurou que “é básico” que non siga o PP no goberno para “limpar as institucións”. Eva Solla, tamén de AGE, acusou de “misóxino” ao presidente da Xunta e lamentou que “seguen esperando a que se tomen medidas”.

Pola súa banda, o voceiro parlamentario do BNG, Francisco Jorquera, censurou que os populares utilizaran a súa “maioría de bloqueo” para impedir a comparecencia do presidente da Xunta ao respecto “da nova imputación” de Baltar (en referencia a que se aceptou a consideración de prexudicada á denunciante).

“Houbo tres novidades dende a última vez: o presunto delito de acoso sexual; a segunda e pode que máis importante -ironizou-, que poderá viaxar a EuroDisney; e a última: que malia a súa tripla imputación, contou co respaldo total e absoluto de Feijóo”, resumiu Jorquera na súa intervención, na que acusou o mandatario autonómico de ser “cómplice” de Baltar Blanco.

PREGUNTA DO PSDEG

Pola súa banda, o PSdeG dirixirase a Feijóo no pleno, durante a sesión de control ao Goberno, para preguntar polas políticas de igualdade, coincidindo coas celebración do 8 de marzo. “Faremos un pequeno debate, deses que lle gustan a Feijóo, de cinco minutiños”, ironizou, ao respecto de que non se aceptou a comparecencia.

“Ademais, nuns días nos que a maior contribución do Goberno galego á política de igualdade, ou polo menos polos xestos, é a entronización do señor Baltar no medio de abrazos do presidente da Xunta e de expresións de adhesión e de coincidencia plena, non sabemos se esa coincidencia tamén inclúe os casos de acoso sexual que se dirimen nos tribunais”, sinalou o voceiro parlamentario do PSdeG, José Luis Méndez Romeu.