O octoxenario que atropelou a varios ciclistas na Garda pode perder o seu carné

O delegado do Goberno en Galicia, Santiago Villanueva, comunicou que o condutor de 87 anos que este sábado atropelou un pelotón de ciclistas na Garda (Pontevedra), accidente que se saldou cun morto e sete feridos, será sometido a un exame para revisar se está capacitado para conducir.

En declaracións aos medios durante un acto en Vigo, Villanueva explicou que para iso se pedirá seguramente unha revisión extraordinaria das condicións psicofísicas do condutor, de cara a dilucidar se pode conservar ou non o seu carné de conducir. “Persoas que poden perder condicións pódeselles retirar o carné de conducir”, explicou.

O home, que ten carné en vigor e cuxo todoterreno ten vixente a ITV, deu negativo nas probas de alcoholemia e de drogas ás que foi sometido, segundo confirmaron fontes da Policía Local da Garda. Tras prestar declaración en sede policial o mesmo sábado, quedou en liberdade con cargos.

Villanueva, que cualificou este caso como “complexo”, tamén comentou este luns que a Garda Civil tomou as medidas correspondentes no lugar dos feitos tras o accidente, e atopa nestes momentos realizando o atestado para a súa remisión o xulgado.

O Tribunal Superior de Xustiza de Galicia (TSXG) indicou que a causa por estes feitos está a cargo do Xulgado de Primeira Instancia e Instrución número tres de Tui, cuxa titular fixará unha data para a declaración do varón investigado unha vez que reciba o atestado da Garda Civil de Tráfico.

CONDICIÓNS DA VÍA

Ao ser cuestionado sobre se se revisarán as condicións de seguridade da vía na que tivo lugar o accidente -en xuño de 2014 na mesma zona unha furgoneta arrastrou oito deportistas-, Villanueva manifestou que hai que esperar ao atestado.

Así as cousas, reparou en que neste informe se concretarán as circunstancias nas que se produciu o accidente, e como circulaban tanto os ciclistas como o condutor. Cando se dispoña do atestado e se tome testemuño ao condutor e aos ciclistas, asegurou que, “a partir dese momento, se tomarán as medidas axeitadas”.

ACCIDENTE

O grave sinistro tivo lugar pasadas as 11,00 horas do sábado preto do lugar de San Xián, no punto quilométrico 43,5 da estrada PO-552, que comunica Baiona e A Garda. Trátase dunha estrada “ancha”, cun carril en cada sentido, e que conta cun espazo habilitado para peóns.

O pelotón de ciclistas estaba integrado por unha vintena de afeccionados, entre os que había veciños de Vigo e do Val Miñor. Así, o falecido é J.A.C.P, de 52 anos de idade, veciño do municipio de Nigrán; mentres que hai sete feridos, os máis graves hospitalizados en unidades de coidados críticos do Hospital Álvaro Cunqueiro; e outros tres ingresados en planta en Povisa.