Localizan o cadáver dun home no encoro de Belesar
Un veciño que pasaba pola zona localizou sobre as 9.00 horas deste luns un cadáver no encoro de Belesar, situado no concello lucense de Chantada e onde hai un mes se perdeu a pista a un mozo de 23 anos veciño de Láncara.
Segundo informaron fontes de emerxencias, o achado produciuse na zona da ponte de Belesar. No lugar traballan efectivos de Protección Civil, Policía Local, Garda Civil e Bombeiros para tratar de retirar o corpo da auga.
A falta de que a autopsia confirme a identidade do falecido, os servizos de emerxencias confirmaron que se trata dun home novo. Dáse a circunstancia de que neste encoro se buscou durante varias xornadas a un mozo de 23 anos desparecido hai un mes en Láncara e o vehículo abandonado do cal foi atopado nas inmediacións do encoro, polo que fontes próximas ao operativo cren que podería tratarse desta persoa.