Incrementouse nun 12% o número de peregrinos chegados a Santiago en febreiro

O número de peregrinos chegados a Santiago durante o mes de febreiro creceu un 12,2 por cento con respecto ao mesmo mes de 2015, ata as 1.733 persoas. Así o reflicten os datos feitos públicos este martes pola oficina do Peregrino da Catedral de Santiago, que recolle que durante o segundo mes de 2016 chegaron a Compostela 189 peregrinos máis que hai un ano. A cifra superou tamén os 1.640 peregrinos chegados en febreiro do último Ano Santo, en 2010.

Nos dous primeiros meses do ano chegaron ata Santiago 3.037 peregrinos, 276 máis que no mesmo período de 2015, o que supón un incremento de case o 10 por cento.

A maior parte dos peregrinos chegados en febreiro procedían doutros puntos de España -39,76 por cento-. Dos estranxeiros, as nacionalidades máis frecuentes foron portuguesas -14,95 por cento-, coreanos -14,37 por cento-, italianos -4,96 por cento- e alemáns -4,85 por cento-.

Por rutas, o 68,96 por cento optaron por seguir o Camiño Francés, o 16,5 fixeron o Camiño Portugués, o 6,75 por cento o Camiño Inglés, e o 2,31 por cento a Vía da Prata e o Camiño do Norte.