Elena Candia ve síntomas de dubidosas legalidades na Deputación de Lugo

A presidenta e voceiro provincial do PP de Lugo, Elena Candia, sinalou que o proceso investigador da chamada ‘Operación Pulpo’, sobre supostos fraudes nas subvencións públicas e amaño en contratacións durante a etapa de Francisco Cacharro (PP) e José Ramón Gómez Besteiro (PSOE), evidencia “síntomas de dubidosas legalidades” que o seu grupo percibira durante o goberno bipartito da institución.

A preguntas dos medios e sen referirse á etapa de goberno do PP, Candia asegurou que ao seu grupo lle preocupa “de modo importante” a situación tras as informacións que publican os medios pola apertura do sumario, e avanzou que levarán algunha pregunta ao respecto o pleno do día 29.

Neste sentido, sinalou que sempre é unha mala noticia que se xeren este tipo de dúbidas sobre unha administración” que está a xestionar diñeiro público”, e asegurou que desexa “que non atope a comisión de ningún delito”.

A maiores e “sendo respectuosos coa presunción de inocencia” e con “toda a actividade xudicial”, Candia ve “evidente” que “había unha mala xestión” por parte de dous partidos que gobernaban esta institución “durante os últimos oito anos”, que merecen “un claro suspenso”, e que a imaxe da Deputación “está a ser moi cuestionada”.

Así sinalou que o grupo popular denunciou “en multitude de ocasións” mediante preguntas en pleno e outras instancias “moitas das cousas que agora se están a investigar”, dado que a xestión que vían “non era clara nin transparente”.