Elena Candia cre que moitos funcionarios de Deputación de Lugo se senten liberados ao investigarse as listas negras

A presidenta do PP de Lugo e voceira na Deputación, Elena Candia, asegurou este venres que “moitos funcionarios” provinciais se sentiron “liberados” tras o auto da xuíza Pilar de Lara que deixa ao descuberto a posible existencia dunha “lista negra” de traballadores vinculados ao PP no ordenador dunha das funcionarias investigadas no marco da Operación Pulpo.

“Moitos funcionarios desa época (a pasada lexislatura) contan experiencias vitais que asustan. Era ‘vox populi’ que había sectarismo na institución, e que quede así documentado permite que saia á luz de forma máis indiscutible. Escoitamos estes días estes funcionarios, que sufriron moito, e a sensación que compartían connosco é que se sentían liberados”, subliñou.

Dito isto, puxo de relevo “unha situación moi comprometida” na institución provincial, pois se fala “de listas negras” no ordenador dunha funcionaria” e de “posible contabilidade irregular” co programa ‘Km0’. Precisamente pola “gravidade” de ambos os dous asuntos é polo que, ao seu xuízo, os socialistas centran as súas respostas sobre a Operación Pulpo na partida de gastos sociais.

Non obstante, asegurou que “non van conseguir” desviar a atención, porque “xa non hai marcha” atrás” e “hai que dar explicacións”. Así é que, como xa anunciou o seu vicevoceiro, Carlos Armesto, os populares levarán este asunto ao próximo pleno da Deputación para que o presidente, Darío Campos, “dea explicacións de todas as informacións tan preocupantes que están a saír nos medios de comunicación”.

E é que, proseguiu Candia, “sen prexuízo que haxa aspectos que afectan moi directamente” ao secretario xeral do PSdeG, José Ramón Gómez Besteiro, “hai tamén aspectos moi importantes que afectan ao funcionamento da institución, a funcionarios e á credibilidade da institución, porque se fala da xestión de moito diñeiro público” e existen “sospeitas da comisión de delitos”.