Enviar a un amigo
Opinar
ImprimirContinúan moi graves os tres dos ciclistas feridos no atropelo da Guarda
Tres dos ciclistas feridos o pasado sábado nun atropelo múltiple na localidade pontevedresa da Guarda continúan hospitalizados con prognóstico moi grave no Hospital Álvaro Cunqueiro (HAC) de Vigo, mentres que outro segue en estado grave.
O Servizo Galego de Saúde (Sergas) informou de que todos eles, que seguen no mesmo estado dende o pasado luns, se atopan en unidades de coidados críticos, concretamente tres na Unidade de Coidados Intensivos e outro en Reanimación.
Ademais, no Hospital Povisa permanecen ingresados en planta e “recuperándose” outros dous ciclistas feridos que, aínda que presentan diversas fracturas, o seu estado “non reviste maior gravidade”, segundo informaron fontes do centro. Un terceiro ferido foi dado de alta o luns.
En concreto, o grave sinistro tivo lugar pasadas as 11,00 horas do sábado preto do lugar de San Xián, no punto quilométrico 43,5 da estrada PO-552, que comunica Baiona e A Guarda. Alí, un vehículo conducido por un home de 87 anos atropelou un pelotón integrado por unha vintena de ciclistas, deixando un morto e sete feridos.
O falecido é J.A.C.P, de 52 anos de idade, veciño do municipio de Nigrán, mentres que os feridos teñen entre 41 e 54 anos de idade. Entre eles atópanse o comisionado do Vigo Tecnolóxico da Universidade de Vigo, José Antonio Vilán, así como o concelleiro do Partido Popular de Nigrán Miguel Alonso.
A DISPOSICIÓN XUDICIAL
O Tribunal Superior de Xustiza de Galicia informou de que está previsto que o autor do atropelo declare no Xulgado de Primeira Instancia e Instrución número tres de Tui este xoves ás 12,00 horas, sempre e cando a xuíza recibira para entón o atestado que está a realizar a Garda Civil de Tráfico.
Tras prestar declaración en sede policial o mesmo sábado, o home quedou en liberdade con cargos por supostos delitos de homicidio por imprudencia e de omisión de socorro. O delegado do Goberno en Galicia, Santiago Villanueva, comunicou este luns que o autor do atropelo será sometido a un exame para revisar se está capacitado para conducir e pode conservar o seu permiso.
