Chega aos xulgados a muller que denunciou a Baltar por ofrecerlle un traballo a cambio de sexo

A muller que denunciou ao presidente da Deputación de Ourense, Manuel Baltar, por supostamente ofrecerlle un traballo a cambio de sexo, Teresa F.C., chegou este martes aos xulgados de Ourense para declarar como investigada por un suposto delito de suborno e tráfico de influencias, dúas horas antes de que tamén compareza polo mesmo motivo o propio Baltar.

A muller chegou sobre as 9,40 aos xulgados cuberta cuns lentes de sol e unha bufanda e acompañada polo seu avogado, que exerceu como escudo para protexela dos medios de comunicación.

Sen apenas levantar a mirada do chan e sen facer ningunha declaración, Teresa F.C. introduciuse no edificio xudicial para declarar como investigada ante a xuíza Eva Armesto, que capitanea o Xulgado de Instrución número 3 de Ourense.

Á súa chegada aos xulgados, o avogado de Democracia Ourensana, Miguel Caride, que exerce a acusación popular neste caso, mostrouse confiado en que a muller “ampliará” a súa declaración inicial contra o presidente da Deputación provincial e en que “explicará os detalles de todo este tema”.

Para Caride “non tería sentido” que, sendo a denunciante inicial, renunciase ao seu dereito a declarar e gardase silencio, a pesar de que nesta ocasión declara como investigada.

A DECLARACIÓN DE BALTAR “É UN ÉXITO”

Paralelamente, o letrado de Democracia Ourensana adiantou que cre que Manuel Baltar, citado a partir das 12,30 horas, se acollerá ao seu dereito a non declarar, algo que “fan habitualmente os políticos”.

Non obstante, subliñou que o feito de que o presidente provincial acuda a declarar finalmente a sede xudicial “é un éxito”, dadas “as pedras que puxo no camiño para non celebrar” a súa comparecencia, que “foron abundantes e grandes”.

Deste modo, Miguel Caride referiuse á “estratexia defensiva” dos avogados de Manuel Baltar, que “inundou o xulgado de escritos, recursos, todos en motivo de forma” cos que intentou aprazar esta declaración.

“Dunha forma ou outra están a dar un pulso ao xulgado, para intentar evitar que a instrución vaia adiante”, sinalou o letrado.

DECLARACIÓNS APRAZADAS

Teresa F.C. estaba chamada a declarar inicialmente o pasado xoves, 10 de marzo, ás 10,00 horas, como investigada, despois de que a xuíza Eva Armesto a citase ao advertir indicios dun delito de suborno tanto pola súa parte coma pola do presidente da Deputación a raíz da súa denuncia.

Non obstante, problemas de saúde por parte do avogado encargado da defensa do presidente da Deputación obrigaron a atrasar esta declaración ata este martes, no que tamén está fixada a declaración de Manuel Baltar.

A comparecencia de Baltar, á súa vez, xa fora aprazada dende o pasado xoves ata este martes despois de que o seu avogado acreditase que o presidente da Deputación tiña previsto unha viaxe familiar a Eurodisney nesa mesma data, e que xa realizara o pagamento de parte antes de citáseselle a declarar.

O CASO BALTAR

A mediados do pasado mes de outubro, Teresa F.C. denunciou ante a Fiscalía que Manuel Baltar lle ofrecera no ano 2010 “unha praza fixa” na Deputación provincial a cambio de manter relacións sexuais. Entón, esta institución aínda a dirixía o seu pai, José Luis Baltar.

Nun primeiro momento, a Fiscalía Provincial de Ourense decretou o arquivo de dilixencias de investigación penal, pero a muller presentou unha nova denuncia ante o xulgado de garda alegando un suposto delito de acoso sexual.

Tras estudar a denuncia e as gravacións achegadas pola muller, a xuíza encargada do caso excluíu a existencia de acoso sexual ao non existir unha relación laboral, docente ou de prestación de servizos entre ambos os dous no momento da relación sexual.

Non obstante, sinalou a posibilidade dun delito de suborno e tráfico de influencias dada a relación persoal de Manuel Baltar co presidente da Deputación no momento dos feitos, o seu propio pai. Tras esta decisión, a muller pasou a ser chamada como investigada como coautora dun delito de suborno, ao igual que o presidente provincial.