Arde parte dunha casa deshabitada en Betanzos
Os Bombeiros de Betanzos extinguiron na madrugada deste mércores un incendio que afectou a un dos pisos dunha casa abandonada na localidade coruñesa de Betanzos. Segundo a información da Central de Atención a Emerxencias 112-Galicia, un particular alertou sobre as 5.00 horas da madrugada de que había un incendio nunha vivenda da rúa Saavedra. Aínda que apuntou que a casa -de tres pisos- estaba deshabitada, informou de que habitualmente no seu interior se atopaban indixentes.
De inmediato foron mobilizados os Bombeiros de Betanzos, a Policía Local e Protección Civil, así como unha dotación sanitaria de Urxencias Médicas 061, aínda que finalmente se comprobou que non había ningunha persoa no interior da casa.
Os efectivos do parque comarcal confirmaron que o lume se iniciou no primeiro piso e non afectou ao resto da construción. Os primeiros indicios apuntan a que as lapas se orixinaron nun colchón.