Abanca e o Colexio de Avogados da Coruña colaborarán na formación de novos letrados

O Colexio de Avogados da Coruña e Abanca subscribiron un convenio de colaboración para a formación de novos letrados, segundo informa a entidade colexial. O acordo foi subscrito polo decano da entidade colexial, Augusto José Pérez-Cepeda Vila, e o director xeral de goberno corporativo e asuntos legais de Abanca, José Eduardo Álvarez-Naveiro.

Segundo a entidade colexial, este convenio busca, por un lado, a realización de prácticas en Abanca de avogados recén colexiados que finalizaran o Máster de Abogacía. A segunda parte do convenio inclúe condicións económicas “favorables” para o desenvolvemento desta actividade profesional.

Para o decano, este convenio supón que os letrados, ademais de ampliar a súa formación, poidan afrontar “dun xeito máis cómodo os investimentos diarios que temos que realizar os avogados”.