Enviar a un amigo
Opinar
ImprimirA neve deixou sen clases a 372 alumnos da provincia de Lugo
A neve caída na última noite deixou sen clase un total de 372 nenos de diferentes centros educativos da provincia de Lugo e obrigou a suspender as clases en catro colexios. Segundo informaron fontes da Consellería de Educación, en total, este luns non puideron acudir a clase por causa da neve 372 alumnos de 14 centros de 12 concellos galegos, todos eles na provincia de Lugo.
De feito, os problemas causados pola neve obrigaron a suspender as clases en catro centros educativos da montaña lucense, o CPI Uxío Novoneyra de Folgoso do Courel, o CPI de Navia de Suarna, o CPI Uxío Novoneyra de Pedrafita do Cebreiro e o CPI Eduardo Cela Vila de Triacastela.
O resto dos alumnos afectados estano por problemas nas liñas de transporte escolar, que non puideron completar os seus itinerarios polo estado das estradas.
Así, outros 10 centros acusaron falta de alumnos por problemas no transporte. Ademais dos catro municipios xa mencionados, están afectados colexios de Baleira, Baralla, Becerreá, Cervantes, A Fonsagrada, O Incio, As Nogais e Samos.
