A ministra de Fomento en Funcións non ve problemas para que o AVE estea en 2018

Ana Pastor na entrega de premios San Telmo

A ministra de Fomento en Funcións, Ana Pastor, cifrou en 2,4 millóns de viaxeiros os rexistrados polo Eixe Atlántico dende a súa posta en servizo e reivindicou o compromiso co AVE a Galicia, ao tempo que sinalou que, dado o presuposto comprometido, non vai “problema” para que se cumpran os prazos e estea en 2018.

Pastor acudiu este luns en Pontevedra á entrega do Premio San Telmo que o Colexio de Enxeñeiros de Camiños, Canles e Portos de Galicia concederon ao Viaduto do río Ulla, “a principal e máis espectacular estrutura do Eixe Atlántico”, en palabras da ministra.

Durante a súa intervención no acto, a ministra subliñou que o Eixe Atlántico rexistrou dende a súa posta en servizo o 18 de abril do pasado ano un total de 2,4 millóns de viaxeiros.

A ministra cualificou esta infraestrutura como a “espiña dorsal ferroviaria de Galicia”, xa que, segundo dixo, percorre a fachada atlántica “mellorando de xeito substancial” tanto as conexións como os tempos de viaxe entre as principais cidades, “ao tempo que abriu un novo horizonte de posibilidades tanto no social como no económico”.

Dirixíndose aos enxeñeiros e empresarios presentes no salón de actos de Afundación durante esta entrega de premios, Ana Pastor pediulles, respecto ás obras do AVE a Galicia, “que se salven os modificados e que se manteñan os investimentos”.

Ana Pastor considera que para rematar “unha obra tan importante como esta” na que houbo unha inversión, soamente na parte galega de máis de 2.000 millóns ademais do viaduto sobre o Ulla, “se necesita o apoio e a colaboración de todos”.

“NINGÚN TIPO DE PROBLEMA”

A ministra cre que nestes momentos esta infraestrutura non corre ningún tipo de risco dende o punto de vista político xa que “vai todo en tempo e en diñeiro”, recordando que os Presupostos Xerais do Estado (PGE) para 2016 están aprobados, “polo que non hai ningún tipo de problema para que chegue o AVE a Galicia en 2018”.

No seu discurso, a ministra de Fomento contestou aos responsables do Colexio de Enxeñeiros de Camiños, Canles e Portos que lle reclamaban máis inversión en obra pública, dicíndolles que “os investimentos teñen que ser as que teñen retorno social e económico”, e citou como exemplo o caso do Eixe Atlántico.

Pastor recordou que “os que non querían ben” aos populares dicían que a ministra invertía nun Eixe de Alta velocidade “que non era necesario”, mentres que ela dicía que Galicia non quería “ser máis que os demais, pero tampouco menos”.

“Demostramos que é unha das liñas de alta velocidade máis utilizadas de toda España e que máis creceu por volume en quilómetros da historia do AVE; eu creo que iso hai que destacalo”, reivindicou.

“SEGUIR FACENDO UN ESFORZO”

Por estes motivos, Ana Pastor cre que “hai que seguir facendo un esforzo” no presuposto”, polo que dirixiu unha mensaxe “a quen teña a responsabilidade” e asumiu o compromiso, no caso de que ela siga á fronte da súa actual carteira, de “seguir facendo o mesmo esforzo que fixen ata hora”.

A titular de Fomento tamén se destacou o mérito reunido polos tres accésits do Premio San Telmo deste ano: o Nó de O Pino (que o Ministerio de Fomento puxo en servizo en xuño do ano 2013 e que supuxo unha considerable mellora da seguridade, a accesibilidade e a mobilidade en todo a área metropolitana da cidade); a primeira fase das actuacións de mellora da operatividad dos peiraos comerciais do Porto de Vigo; e a conexión do corredor Brión-Noia coa estrada AC-550 en Taramancos, unha obra dependente da Xunta de Galicia.