A flota faena con normalidade en Lugo pero parte permanece amarrada na Coruña e Pontevedra

A flota pesqueira da provincia de Lugo faena este martes con normalidade, debido á mellora das condicións meteorolóxicas nesta costa. Non obstante, permanecen amarradas parte das embarcacións do litoral de A Coruña e Pontevedra, polo mal tempo que se rexistra no mar.

Así o indican fontes de confrarías e lonxas consultadas. En concreto, na Mariña luguesa, a confraría de Burela informa dunha “boa situación no mar”, polo que todos os buques, incluídos os arrastreiros, saíron esta xornada a faenar. En canto a Viveiro, o pósito sinala que o mar está “tranquilo”, polo que todos os barcos saíron.

Mentres, na provincia de A Coruña, o panorama difire en función das confrarías consultadas, e así en Ortigueira destacan que “está bastante malo”, polo que as embarcacións quedaron amarradas, como en Fisterra, onde “hai bastante mar”, e en Ribeira, xa máis ao sur, onde “a maioría quedou en terra”. Non obstante, o pósito coruñés sinala que a flota si decidiu faenar esta xornada, como o fixo en Cariño, segundo testemuñan dende a lonxa.

En Pontevedra acontece algo similar, con “temporal e moita marusía” en alto mar, segundo perciben dende a confraría de Vilaxoán, onde a flota quedou en porto. En Bueu estiman que o 80% dos barcos están amarrados e na lonxa de Baiona dan conta de que “ninguén” saíu a pescar este martes.

DE ALERTA LARANXA A AMARELA

Meteogalicia recolle para este martes unha alerta de nivel amarelo por precipitacións nas provincias de A Coruña e Pontevedra e o paso dunha fronte con pouco movemento que achegará ceos moi anubrados e chuvias persistentes principalmente no terzo norte de Galicia.

Ao arranque da semana, este luns, a alerta era de cor laranxa na comunidade, o que motivou que a maior parte da flota galega permanecese amarrada.