Suspéndese momentaneamente o pleno no que se debate a moción sobre Rajoy ante a tensión entre o público

O ambiente caldeado, con asubíos e apupos desde as butacas do público, levou ao alcalde de Pontevedra, Miguel Anxo Fernández Lores, a suspender momentaneamente, durante cinco minutos, o pleno municipal no que se debate a moción para nomear persoa ‘non grata’ ao presidente en funcións do Goberno, Mariano Rajoy.

No momento no que tomaba a palabra o portavoz do PSdeG, Tino Fernández, para expor a argumentación sobre esta moción, que tamén impulsa a Marea de Pontevedra, desde o público producíronse asubíos e apupos que impedían escoitar ao edil que tiña que intervir.

Por iso, o alcalde decidiu suspender momentaneamente a sesión plenaria, na que está previsto que salga adiante a declaración de Mariano Rajoy como persoa ‘non grata’ cos 12 votos do BNG, o tres do PSdeG e os dous da Marea de Pontevedra.