Suspéndese ata o 10 de maio o xuízo por intrusismo a un podólogo

O xuízo por intrusismo profesional que se ía celebrar este martes nos xulgados de Santiago contra un home que exerceu como podólogo durante 20 anos quedou suspendido ata o 10 de maio, ás 10,30 horas, pola ausencia dunha das testemuñas, a intervención dos cales tanto a acusación particular e Fiscalía como a defensa consideraron “fundamental”.

A titular do Xulgado do Penal número 2 de Santiago, María Elena Fernández Currás, fixou esa nova data unha vez que comprobou, xa na sala e ante a presenza do propio acusado, E.A.A., que faltaba unha testemuña, un home que supostamente exercía no centro en cuestión, pero que segundo afirma a acusación particular -o colexio oficial de podólogos- “en realidade non exercía”, senón que era utilizado, ao igual que outros profesionais, para acreditar a institución ante as autoridades sanitarias.

De feito, en declaracións aos xornalistas antes de comezar a vista oral, coñecedor de que se suspendería, o presidente do colexio profesional, Borja Pérez Montañés, destacou que o organismo que lidera “non quere deixar ningunha abertura de dúbida de que esta persoa non era a que realizaba as prácticas de podólogo”.

De aí que a avogada que representa ao colexio pedira a suspensión da vista oral, ao igual que a fiscal e tamén como o letrado da defensa.

PROCESO

No seu momento, o colexio instou a Sanidade a que realizase unha inspección no centro, e a consellería “constatou que non era unha podóloga e viu indicios de caso de delito por intrusismo”, segundo relatou Pérez Montañés. Por iso, deu traslado á Fiscalía, que foi a que iniciou o procedemento penal.

Tanto o Ministerio Público como a acusación particular piden para E.A.A. dous anos de prisión e unha multa económica baseándose no que establece a lei, e o colexio de podólogos entende que existen “indicios de peso que acreditan o delito”.

Segundo o presidente da institución, o acusado “non ten a titulación” e, aínda que “di ser o xerente do centro”, o colexio profesional asegura ter “constancia, evidencia e probas de que el era o que exercía”.

“Pero para acreditarse ante Sanidade o que utilizaba era o título doutros profesionais, podólogos, que, co gancho de que os ía contratar para determinadas horas no centro, solicitaba o seu título para presentalo a Sanidade”, explicou Pérez Montañés. “Despois nunca chegaban a exercer alí”, apostilou.