Sol Vázquez destaca na Coruña a importancia do asociacionismo para impulsar a competitividade das Prazas de Abastos

Sol Vázquez na presentación da campaña. Foto: M. Fuentes

A directora xeral de Comercio, Sol Vázquez Abeal, destacou esta mañá na presentación da campaña de Entroido impulsada polas asociacións de praceiros dos mercados de Eusebio da Guarda, San Agustín, Monte Alto, Elviña e As Conchiñas, que veñen de integrarse na Federación de Prazas de Abastos de Galicia (Fepragal), o importante papel que desenvolve o asociacionismo na mellora da competitividade do sector comercial.

Neste sentido, Vázquez Abeal, que visitou a praza de San Agustín, onde se presentou a iniciativa que incluirá sorteos de lotes de produtos de Entroido e obsequio de doces típicos, destacou a unión e a cooperación como claves para obter mellores resultados e un mellor posicionamento das prazas de abastos, coa posta en marcha de diferentes iniciativas que permiten incrementar e mellorar os servizos que se achegan aos consumidores, fidelizar aos clientes e dinamizar as vendas.

O impulso ao asociacionismo comercial é un dos eixos da estratexia de apoio ao sector que desenvolve a Consellería de Economía, Emprego e Industria. No que levamos de ano a Consellería leva convocadas axudas que suman 2,5 millóns de euros tanto para as asociacións de comerciantes dos centros comerciais abertos e as prazas de abastos como para as federacións de comerciantes.