Raquel Arias avanza que na súa executiva provincial non haberá vicepresidentes

A delegada territorial da Xunta en Lugo e candidata a dirixir a formación provincial, Raquel Arias, avanzou que, se gaña o congreso do próximo 6 de marzo, “non haberá vicepresidentes” na súa executiva provincial, e alegou que ela e o seu equipo “non” conciben a dirección do partido como “unha repartición de sillóns”.

“Resulta obvio dicir que nós non entendemos a dirección provincial do PP de Lugo como unha repartición de sillóns, senón como un equipo compacto, con atribucións concretas para cada un dos seus integrantes, que serán corresponsables das decisións que se adopten e das accións políticas que se desenvolvan”, asegurou.

A candidata avogou por conformar unha dirección provincial na que se combine “experiencia e mocidade” pero que, ante todo sexa unha estrutura “operativa, capaz de aglutinar as distintas sensibilidades existentes” no partido. E, “por encima de todo”, que estea “disposta a traballar por e para o partido”.

“E por e para dar resposta aos retos que temos por diante, principiando por recuperar a ilusión da nosa militancia e o respaldo da cidadanía”, sentenciou, á vez que apostou por unha executiva “cunha importante presenza das bases, dos militantes sen cargo orgánico nin institucional”; na que teñan tamén “peso específico” alcaldes e portavoces e haxa “unha nutrida representación territorial”.

Nesta estrutura, segundo explicou, o equipo directivo ten que estar “predisposto” a fomentar “a participación, o dinamismo e a transversalidade en todos os niveis da estrutura organizativa e en todos os ámbitos da acción política”.

Como consecuencia desta “concepción compacta” e en aras dunha “maior operatividade”, ratificou que na súa executiva “non haberá vicepresidentes”. Na súa opinión, o debate que debe presidir esta fase do proceso no que está inmerso o PP de Lugo é “o modelo, a estrutura e a filosofía do proxecto que cada quen defende e presenta á militancia”.