Pasa a disposición xudicial o presunto agresor da lucense que estivo desaparecida dous días

O presunto agresor da muller lucense que permaneceu desaparecida dous días tras fuxir del por sufrir supostamente malos tratos pasou a disposición xudicial na tarde deste luns.

Beatriz López, de 26 anos, foi localizada nun hostal o domingo logo de que os seus pais denunciasen a desaparición o venres. A muller, que dixo fuxir tras ser agredida, formalizou a denuncia contra o seu exnoivo na comisaría e este luns volveu declarar ante a Policía.

Fontes policiais consultadas ratificaron que o detido partiu da comisaría pasadas as 17,30 horas cara ao xulgado, para pasar a disposición xudicial.

A secretaria xeral de Igualdade, Susana López Abella, animou este luns a todas as mulleres e familias en situacións similares a chamar o 016 para coñecer todos os recursos que teñen á súa disposición.