O xuíz chama a declarar a unha persoa como investigada e a dúas testemuñas no caso das monxas retidas

O titular do Xulgado de Instrución número 3 de Santiago, Andrés Lago, citou a declarar a tres persoas en relación ao caso das monxas supostamente retidas nun convento de clausura compostelán. Segundo informou o Tribunal Superior de Xustiza de Galicia (TSXG), Lago Louro decidiu practicar dilixencias de investigación consistentes en citar a dúas persoas en calidade de testemuñas e a unha como investigada.

A intención é poder “formarse un mellor criterio sobre a existencia de indicios de responsabilidade penal” neste caso, aberto despois de que unha persoa denunciase que varias monxas de nacionalidade india que formaban parte do convento das Mercedarias de Santiago estaban retidas no mesmo.

A xuíza de garda cando se recibiu a denuncia, Ana López-Suevos, enviou a unha comisión xudicial o 23 de xaneiro para comprobar se as monxas que se atopaban neste centro o facían por propia vontade. Tras entrevistarse con cinco monxas de orixe india, tres delas informaron de que iniciaran un proceso de “dispensa de votos” para abandonar o convento e fóronse cos axentes.

Dado que ningunha das monxas que abandonou a congregación decidiu interpor denuncia, o caso depende tanto das dilixencias que practique o xuíz instrutor, agora Lago Louro, como da decisión da Fiscalía de presentar acusación, algo que, polo momento, aínda non fixo público.