O PSOE esixe o cesamento fulminante do concelleiro que insultou a Silva

O PSdeG advertiu ao presidente da Xunta e líder do PP galego, Alberto Núñez Feijóo, de que “non vale coas desculpas” expresadas polos insultos que o concelleiro do PP de Moraña (Pontevedra), Jorge Caldas, responsable local de Igualdade, dirixiu á presidenta da Deputación de Pontevedra, Carmela Silva, nunha rede social.

Ao respecto, a deputada Carmen Gallego, en rolda de prensa, esixiu o “cesamento fulminante” do edil, que o PP o dea de “baixa de militancia” e a “asunción de responsabilidades” da alcaldesa, da que os socialistas din que “non dubidou en xustificar” as palabras “noxentas” e “impresentables” de Caldas, nun acto de “complicidade”.

En concreto, o concelleiro chamou “mala raposa” e “sinvergüenza” a Silva nunha publicación de ‘Facebook’ que abordaba o conflito entre organizadores do rallye Rías Baixas e membros da Deputación, que motivou que o último pleno se celebrase a porta pechada.

Para Galego, se Feijóo non cesa “hoxe”, por este mércores, ao edil, “estará a dicir que é un presidente machista” e que “tolera” e “consente” actuacións deste tipo na súa formación.

Ademais de criticar as políticas dos populares en materia de loita contra a violencia de xénero -“co PP no Goberno o machismo repunta”, afirmou-, a parlamentaria reclamou “unha política de xestos”, ao considerar que no relativo a estes asuntos tamén é relevante.

Así, instou a Feijóo a “poñer orde no seu partido”, xa que “chove sobre mollado”, despois da polémica que rodea o presidente da Deputación de Ourense, Manuel Baltar, ao que unha muller acusou de ofrecerlle un posto de traballo a cambio de sexo.

“INSULTO A TODAS AS MULLERES”

Gallego insistiu en que, de non se producir o cesamento e a asunción de responsabilidades da rexedora -que, segundo sinalou, “ten que dirimir o PP” en que se concretan-, o insulto do concelleiro irá dirixido a “tódalas mulleres”.

Por iso, solicitou a Feijóo expresarse con “contundencia”, e unha “declaración en firme de que vai destituír este concelleiro”, así como pedir responsabilidades a unha alcaldesa, Luisa Piñeiro, que “é do PP e muller”.