O PSOE de Pontevedra esixe o cesamento do edil que insultou a Carmela Silva

O secretario xeral do Partido Socialista de Pontevedra, Santos Héctor Rodríguez, esixiu o cesamento do concelleiro do Partido Popular en Moraña, Jorge Caldas, que exerce a tenza de alcaldía, por insultar a presidenta da Deputación de Pontevedra nas redes sociais, onde lle chamou “mala raposa e sinvergüenza”.

Santos Héctor compareceu na escalinata principal da Deputación para lanzar esta esixencia e, pola contra, advertir da “ruptura total de relacións tanto institucionais como políticas co Partido Popular”.

Así, tras reprobar as “expresións cargadas de violencia machista contra as mulleres” proferidas polo edil popular, reclamou ao presidente do PP galego, Alberto Núñez Feijóo, “que ten ata este mediodía para cesar e dar de baixa no Partido Popular ao tenente de alcaldesa de Moraña”. “Se o señor Feijóo non o fai así é cómplice destas expresións cargadas de violencia machista”, incidiu.

Ademais, reclamou o líder dos populares galegos que “esixa” á alcaldesa de Moraña, María Luisa Piñeiro, tamén do PP, as “responsabilidades” por “xustificar e animar a un acto de violencia verbal”.

Segundo aseguran os socialistas, a alcaldesa deulle un gústame’ en ‘Facebook’ ao comentario feito polo edil Jorge Caldas referido á presidenta da Deputación.

A denuncia pública deste feito partiu do BNG de Moraña. Nun comunicado asinado polos edís Marcos Suárez e Eva Villaverde, a formación informou de que o pasado venres, despois do pleno provincial que foi suspendido mentres se trataba a falta de apoio económico ao rallye Rías Baixas, Jorge Caldas respondeu a uns comentarios “totalmente denigrantes e pexorativos” por parte dun “simpatizante do PP”.

Nunha mensaxe publicada na devandita rede social ás 17,27 horas do venres en ‘Facebook’, o tenente de alcalde do PP acusou a Carmela Silva de “mala raposa e sinvergüenza”.

Este mércores, o PSOE instaron ao Partido Popular a que “non se consinta ningún tipo de violencia machista, nin tan siquiera verbal”. Santos Héctor insistiu en que “todos” deben comprometerse “co traballo para eliminar lácraa que están a sufrir as mulleres neste país”.

CRIME DE MORAÑA

Finalmente, anunciou que o PSdeG vai denunciar ante a Fiscalía os insultos proferidos ao entender que “é máis intolerable, se cabe, que o faga un representante de veciños e veciñas de Moraña”, en referencia ao dobre crime rexistrado o 31 de xullo do pasado ano neste municipio onde un home supostamente asasinou ás súas dúas fillas de 4 e 9 anos.

Santos Héctor precisou que fala en nome do partido e do grupo provincial do PSOE na Deputación e sinalou que a presidenta da institución provincial, Carmela Silva, fará declaracións ao respecto esta tarde no transcurso da inauguración da exposición ‘Mulleres en acción. Violencia cero’.