O presunto agresor da lucense desaparecida pasará a disposición xudicial

O presunto agresor da muller lucense que permaneceu desaparecida dous días tras fuxir del por sufrir malos tratos pasará a disposición xudicial na tarde deste luns ou o martes pola mañá, segundo fontes policiais.

Beatriz López, de 26 anos, foi localizada nun hostal o domingo logo de que os seus pais denunciasen a desaparición o venres. A muller, que dixo fuxir tras ser agredida, formalizou a denuncia contra o seu exnoivo na comisaría.

A secretaria xeral de Igualdade, Susana López Abella, animou este luns a todas as mulleres e familias en situacións similares a chamar o 016 para coñecer todos os recursos que teñen á súa disposición.

“Quero dicilo ás mulleres e familias que denuncien para que poidamos actuar, todos estiveron pendentes do que podía pasar con Beatriz, agora sentimos alegría ao ver que apareceu ben a pesar das agresións das que foi obxecto, insistir en que hai apoios, as mulleres, por favor, que chamen ao 016, que acudan aos servizos sociais máis próximos”, insistiu.

Ademais, confirmou que a Xunta está a disposición da muller agredida no que se refire a atención psicolóxica, “que seguro que a necesitará”.

POSIBLES NEGLIXENCIAS

Con respecto á investigación sobre posibles neglixencias na Casa da Muller de Lugo antes do crime de Becerreá, López Abella recoñeceu que “é importante” que se depuren responsabilidades “se as hai”, aínda que engadiu que en todas as institucións que levan estes casos “se traballa con gran responsabilidade”.

En canto á actividade de Igualdade, López Abella recordou que as redes sociais se converten nunha “arma letal” cando se utilizan para controlar, polo que avanzou que promoverán novos programas en colaboración coa Valedora do Pobo. Ademais, indicou que continúa a campaña ‘Stop ou mal amor” porque “o máis preocupante xa non é o control exercido polos homes, senón que moitas mulleres cren que os celos son porque as queren’.

López Abella visitou Lugo para informar o persoal das Casas da Muller e responsables políticos da área de igualdade da modificación do decreto que regula estes centros de información “para axustalo á realidade”. O obxectivo é que o novo documento estea publicado nun prazo de catro meses e que recolla medidas de apoio ao colectivo LGTB.