O mal tempo volve a impedir a procura dos dous mariñeiros desaparecidos en Cíes

O temporal que afecta á costa galega obrigou a suspender este xoves por terceira xornada consecutiva a procura dos dous mariñeiros desaparecidos fai 13 días ao sur das Illas Cíes. Segundo confirmaron fontes de Salvamento Marítimo, o operativo mantense suspendido este xoves polas malas condicións do mar na zona na que desapareceron os tripulantes.

Con esta son xa tres xornadas nas que os servizos de emerxencias non puideron saír a buscar aos desaparecidos polo temporal, desde que o luns a embarcación ‘Salvamar Mirach’ de Salvamento Marítimo, percorrese a costa norte desde Domaio (Moaña) até Punta Subrido (Cangas), acompañada de varias embarcacións voluntarias.

Durante esa xornada tamén rastrexaron por terra a costa de Cangas e Moaña efectivos de Protección Civil de ambas as localidades, así como voluntarios, aínda que sen atopar ningún indicio.

Os mariñeiros permanecen desaparecidos desde o día 29 de xaneiro, xornada na que saíron a faenar na planadora ‘Látigo’ con previsión de regresar a porto sobre as 18,00 horas. O sábado, o ‘Pesca I’, que rastrexaba a zona, localizou a media milla ao sur do illote de Boeiro a embarcación afundida, pero non se puido atopar rastro dos mariñeiros nas inmediacións.