O grupo ciclista Supermercados Froiz preséntase na Deputación de Pontevedra

Presentación do equipo

A presidenta da Deputación de Pontevedra, Carmela Silva, e o fundador da empresa Froiz, Magín Froiz, acompañados da deputada de Deportes, Chelo Besada, concelleiros de Pontevedra e Poio e o ex-ciclista Álvaro Pino, acolleron o grupo deportivo ciclista Supermercados Froiz na presentación do cadro de corredores e o corpo técnico.

Magín Froiz, que lle mostrou o seu agradecemento á Deputación de Pontevedra polo apoio prestado, destacou que a aposta da empresa polo equipo ciclista “débese a que cremos que o deporte fai ás persoas máis responsables”.

Pola súa banda, Carmela Silva subliñou que “as administracións públicas debemos apostar polo deporte, pola súa capacidade para o fomento de hábitos saudables pero, sobre todo, por ser un dos instrumentos máis importante de socialización”. Neste contexto, a presidenta destacou o exemplo e a responsabilidade social da empresa Froiz, “que aporta parte dos seus beneficios en apoiar o deporte”.

Carmela Silva manifestou, ademais, que “un dos deportes que ten dado máis satisfacción á provincia de Pontevedra é o ciclismo; de feito, temos aquí a un dos grandes ciclistas do noso país, Álvaro Pino, que levou o nome da nosa provincia polo mundo adiante”. A presidenta rematou desexándolle moito éxito deportivo ao grupo ciclista Supermercados Froiz.