Noriega aposta por seguir acumulando forzas para disputarlle a hexemonía ao PP

O alcalde de Santiago, Martiño Noriega, considera que o senador de En Marea José María García Buitrón, quen encabezará a xestora que coordinará a renovación da dirección de Podemos en Galicia, é unha persoa “dialogante” e “formada” para levar a cabo esta tarefa.

E é que sostén, en clara alusión á formación morada en Galicia, que “na medida en que lle vaia ben a unha das partes do proceso de acumulación, lle irá ben ao conxunto do proceso”.

Noriega pronunciouse sobre este asunto despois de ser preguntado polos xornalistas e tras a disolución do Consello Cidadán autonómico e a Comisión de Garantías a raíz das numerosas dimisións que tiveron lugar ao longo das últimas semanas.

A este respecto, o tamén cabeza visible de Compostela Aberta fixo fincapé en que os “procesos internos” das formacións políticas os teñen que marcar elas mesmas: “As decisións que estas adopten dentro das súas propias dinámicas son decisións a respectar. Eu prefiro non valorar máis alá da boa relación que teño co doutor Buitrón, que é senador por En Marea no Senado”.

A continuación, subliñou que o “proceso de acumulación” de forzas, que “leva anos acontecendo e que “na última etapa foi En Marea, está “moi lanzado” e supón “un lugar de encontro de diferentes sensibilidades”.

“RETO HISTÓRICO”

É máis, sostén que este “proceso de acumulación” mostrou o seu “potencial” e ségueo facendo, polo que considera que “está en disposición de disputarlle a hexemonía ao PP”.

“Se alguén se move da foto perde quen se move e perde tamén o proceso”, remarcou Noriega, quen entende que o proceso de acumulación “unicamente” pode seguir acumulando forzas” de cara a un “reto” que, ao seu xuízo, é “histórico”.

Por iso, espera que todas as forzas que integran En Marea estean “á altura do reto” e que o proceso “non teña pasos atrás e siga avanzando”. “A pesar do complicado que é conciliar, moitas veces, diferentes sensibilidades nun proxecto colectivo”, matizou.

Preguntado por se os asuntos internos de Podemos poderían prexudicar a imaxe de En Marea, Noriega subliñou que “mentres sexa en beneficio do proceso de En Marea non”.

Nesta mesma liña, tras ser preguntado directamente por se o perfil de García Buitrón podería favorecer a reedición de En Marea para as autonómicas, Noriega explicou que se trata dunha persoa que “participou amplamente do proceso de En Marea e que “viu o seu potencial social”, ademais de ser unha persoa “dialogante” e “formada” para coordinar a renovación da dirección de Podemos en Galicia.

Así, mostrou o seu respecto ás “decisións que se están a adoptar” e desexoulle “a mellor das sortes” á formación morada en Galicia: “Na medida de que lle vaia ben a unha das partes do proceso de acumulación iralle ben ao conxunto do proceso”.