Médicos do HAC lanzan unha alerta polos problemas do hospital e piden a dimisión de Rubial

Rolda de prensa do grupo de facultativos

Facultativos do Hospital Álvaro Cunqueiro de Vigo compareceron este venres ante os medios para facer público o seu malestar polo mal funcionamento do centro, os problemas de planificación e falta de recursos, e para reclamar que se rescate a concesión e sexa “cen por cento público”.

Un grupo de médicos, en representación de case 300 profesionais que asinaron un carta de denuncia, explicou que senten “decepcionados” por como está a funcionar o Álvaro Cunqueiro, e reclamou a dimisión do xerente, Félix Rubial, do que rexeitan a súa “actitude prepotente”. “Estamos realmente avergonzados da situación do HAC, e nós queremos que funcione”, sinalou o otorrino Jesús Araújo.

Este médico recordou que o traslado ás novas instalacións foi “totalmente desconcertante e apresurado”, e se fixo “sen contar cos traballadores”. Ademais, reprochou aos xefes de servizo a súa “conivencia” coa dirección do Chuvi e o “cheque en branco” outorgado á xerencia nese traslado.

“Non podiamos ser alleos ao que está a pasar, despois dalgúns meses decidimos dar este paso adiante”, recalcaron os facultativos, os que compararon esta denuncia pública cunha “chamada de alerta” para lograr “que o hospital funcione”.

PROBLEMAS

Araújo concretou que a falta de medios técnicos e humanos é o principal problema do HAC, ademais doutras cuestións como a mala planificación, defectos estruturais e de circulación nas instalacións, falta de laboratorio central, ou suspensión de intervencións por problemas coa esterilización. De feito, apuntou que “hai 5 quirófanos aínda pechados” dos 20 que hai no hospital.

Estes problemas teñen consecuencias non só na calidade da asistencia se non que, apuntou, nas listas de espera cirúrxica. Segundo indicou, os pacientes do HAC en espera dunha operación poderían superar os 15.000 solo na lista estrutural (o dobre dos recoñecidos oficialmente polo Sergas), o que “di moi pouco da transparencia da dirección”.

O neumólogo Manuel Núñez subliñou que este malestar é compartido pola “inmensa maioría dos médicos”, aínda que só un 40 por cento asinara a carta dirixida a Núñez Feijóo, ao conselleiro Vázquez Almuíña e a directivos do Chuvi. Moitos dos médicos, precisou, evitaron poñer o seu nome por medo a represalias e pola súa situación laboral precaria; outros, recoñeceu, teñen “intereses privados moi importantes”.

“DECEPCIONADOS”

En todo caso, puxo en valor que case 300 médicos apoiasen o escrito, e incidiu en que todos viron a apertura do HAC como unha oportunidade coa que estaban “moi ilusionados”, aínda que agora están igual de “decepcionados”.

Ademais, os médicos que compareceron este venres explicaron que aínda non tiveron resposta á carta e que, malia un cambio á fronte da Consellería (coa marcha de Rocío Mosquera e a chegada de Jesús Vázquez Almuíña) e movementos na dirección do Chuvi, “as cousas están igual que ao principio, e non a vai a solución”.

“Queremos recuperar o prestixio da sanidade pública”, proclamou o xinecólogo Luis Alba, quen criticou a xestión público-privada do Hospital Álvaro Cunqueiro.