Máis de medio centenar de mergulladores buscan aos desaparecidos nas illas Cíes

Máis de 50 mergulladores participarán este venres nos labores de procura dos dous mariñeiros desaparecidos hai unha semana ao sur de Illas Cíes. Segundo confirmou Salvamento Marítimo, os mergulladores continuarán os labores iniciados o xoves coa melloría do estado do mar e que permitiron localizar o motor e aparellos da planadora afundida, pero non deron cos mariñeiros desaparecidos.

Así, nesta xornada participarán máis de 50 mergulladores formados por profesionais da área voluntarios, membros de Salvamento Marítimo, Bombeiros de Vigo e os GEAS da Garda Civil, que coordinarán o operativo. Está previsto que se inspeccionen zonas diferentes ás revisadas o xoves e a maior profundidade.

A procura realízase na contorna do illote Boeiro, onde o sábado localizáronse afundidos restos da planadora Látigo, na que faenaban os dous mariñeiros desaparecidos. O mal estado do mar impediu que os labores de inmersión se iniciasen até o xoves.

Ademais dos mergulladores, este venres volverá levar a cabo un dispositivo de procura por terra, en previsión de que o mar puidese achegar algún resto até a costa. Efectivos de Protección Civil e voluntarios participan neste operativo.