Fortes medidas de seguridade ante o inicio do xuízo polo asasinato de Lupe Jiménez

A Audiencia Provincial de Pontevedra comezou este martes blindada por fortes medidas de seguridade a cargo da Policía Nacional para evitar enfrontamentos entre familias xitanas a raíz de inicio do xuízo polo asasinato de Lupe Jiménez, do que está acusado o seu marido.

As autoridades xudiciais solicitaron estas medidas extraordinarias ante o previsible reencontro entre as familias da vítima e o acusado. Tras o crime, acontecido en 2014, o Consello Xitano de Galicia ordenou o desterro de todos os familiares do agresor que vivían en Vigo, Santiago, A Coruña e Lugo “para evitar baños de sangue”.

Non obstante, segundo apuntan dende o ámbito, esta circunstancia non se produciu, xa que ningún familiar do acusado veu ata Pontevedra coincidindo co xuízo.

O avogado da familia Jiménez, Víctor Bouzas, en declaracións aos medios, informou de que o letrado da defensa lle adiantou que o acusado “vai recoñecer os feitos” e engadiu que cre que solicitarán que “se”fale dun homicidio e non dun asasinato”.

Pola súa banda, unha das irmás da falecida, Cristina Jiménez, declarou que a familia espera que o acusado “sexa condenado e que cumpra a pulso”, sen privilexios”, ao tempo que reiterou que desexan “que cumpra a cadea perpetua”.

“EVITAMOS O OLLO POR OLLO”

O presidente da Sociedade Xitana de Galicia, Sinaí Jiménez, tamén acudiu ata a Audiencia de Pontevedra, onde trasladou a súa “satisfacción” por chegar “ao xuízo paio sen que se celebrara anteriormente, como é habitual, o xuízo xitano”.

Sinaí Jiménez pediu unha “sentenza exemplar” e reiterou a súa “confianza na Xustiza”. “Hoxe podemos estar contentos e alegres”, dixo Jiménez, alegando que, grazas á intervención do Consello de Anciáns, evitou “o ollo por ollo”.

XURADO POPULAR

Ás 10,00 horas iniciouse o proceso de selección das once persoas (nove titulares e dous suplentes) que formarán parte do xurado popular, un trámite que se prolongará durante boa parte da mañá e ao termo da cal comezará a vista oral.

Estes cidadáns emitirán un veredicto sobre a culpabilidade ou non do acusado, José Luis C.R., acusado do asasinato da súa muller, María Luisa Jiménez Jiménez, coñecida como Lupe, nun caso de violencia de xénero polo que a Fiscalía e a acusación particular piden 20 anos de prisión.

A Audiencia fixou inicialmente dúas xornadas -martes e mércores- para a celebración do xuízo, aínda que logo será necesario prolongar o proceso ata que o xurado emita un veredicto.

CONFESOU TRAS A SÚA DETENCIÓN

Segundo recolle o escrito de Fiscalía, José Luis C.R., que está en prisión provisional por estes feitos dende o 25 de febreiro de 2014, matou a súa muller o mesmo día que a obrigou a acompañalo dende a súa casa en Vilaboa. Para iso, propinoulle 12 puñaladas na zona do tórax usando unha navalla, que lle cravou tres veces no colo e unha no pulso.

No momento da súa morte, Lupe Jiménez estaba embarazada de cinco semanas, de modo que ao acusado o consideran autor dun delito de asasinato en concurso ideal cun delito de aborto. Así mesmo, levaba 24 anos casada co seu presunto asasino, de aí que o fiscal e a acusación particular determinen que concorre a circunstancia agravante de parentesco.

Aínda que o matrimonio vivía en Lugo, a muller mudouse a vivir coa súa nai a Vilaboa un par de meses antes do crime cos seus cinco fillos menores por problemas na parella. O 23 de febreiro de 2014, José Luis C.R. foi buscala a Vilaboa e convenceuna para que a acompañase.

Nese momento, a familia dela denunciou a súa desaparición ante a Garda Civil. Dous días despois, o home foi detido e el mesmo relatou onde deixara o cadáver de Lupe, nunha zona forestal do concello coruñés de O Piñeiro.

Fiscalía, ademais dos 20 anos de prisión, reclama que o acusado indemnice os fillos da muller con 47.931 euros a cada un dos cinco que entón eran menores e con 19.172 á única que xa era maior de idade. A familia da vítima reuniu 5.000 sinaturas pedindo que José Luis C.R. cumpra de forma íntegra a pena que se lle impoña.