Dous concelleiros do goberno de Lores avogan por suprimir o límite de mandatos no BNG

Dous edís do goberno de Pontevedra liderado por Miguel Anxo Fernández Lores, Anxos Riveiro (tamén responsable comarcal) e Carme da Silva (tamén vice responsable local), defenderon, ante o Consello Nacional -máximo órgano de decisión entre asembleas-, que os estatutos do BNG supriman o límite de tres mandatos establecidos para os cargos da formación. Así mesmo, propuxeron a eliminación de diversas incompatibilidades.

O documento base que se someterá a consideración das asembleas comarcais, antes de chegar ao plenario do 28 de febreiro, xa ten incorporada unha das propostas que facían estas tres membros dos órganos locais. Concretamente, xa está incorporada a eliminación da imposibilidade de que o voceiro nacional do BNG sexa, á súa vez, o candidato á Presidencia da Xunta, como se decidiu estatutariamente na asemblea de 2012 celebrada en Amio.

A supresión do límite de mandatos asínana as dúas edís do goberno de Miguel Anxo Fernández Lores, que asumiu por primeira vez a Alcaldía en 1999, xunto á integrante do Consello Comarcal Eva Vilaverde. Debateuse o seu texto o pasado sábado no Consello Nacional do BNG.

Aínda que a emenda non foi asumida no seu conxunto, e noutros casos (como o do voceiro nacional) os integrantes do consello decidiron transformar as súas teses en voto particular para o seu debate nas asembleas, as tres pontevedresas non o fixeron.

Non obstante, presentarán as súas ideas nos debates locais e comarcais, segundo confirmou a responsable comarcal, Riveiro. Ao respecto, valorarán a posibilidade de convertelas en emendas parciais para modificar parcialmente os estatutos.

No documento presentado ante o Consello Nacional, as dúas edís e a integrante do consello local apostaron por determinadas modificacións estatutarias co argumento de que “ou ben son asuntos superados pola lexislación actual, ou son inaplicables, ou ben levan a un funcionamento inoperativo” da organización.

ELIMINAR LÍMITES COMO O QUE PESABA SOBRE LORES

Neste apartado, as asinantes pontevedresas desta emenda propuxeron que se elimine o máximo de tres mandatos consecutivos na mesma función, unha condición que se impuxo a partir da décima asemblea, que se celebrou en 2002.

Este impedimento suporía, por exemplo, que o rexedor de Pontevedra non podería repetir como candidato xa en 2015 (foino por primeira vez en 1999 e xa co límite de mandatos en 2003, en 2007 e en 2011). Pero a dirección nacionalista defendeu aplicar a posibilidade de excepción neste caso, “máis que xustificada” en palabras, ditas entón, polo voceiro nacional, Xavier Vence.

Ademais, as tres pontevedresas tamén propoñen que o máximo órgano de decisión entre asembleas, o Consello Nacional, deixe de ostentar de forma exclusiva a facultade de “establecer excepcións á aplicación” das medidas previstas estatutariamente, como se fixo no caso do rexedor de Pontevedra para as municipais de 2015.

As modificacións estatutarias que defenden as edís pontevedresas do BNG pasan por eliminar a incompatibilidade de máis dun cargo institucional e por suprimir que nos concellos de máis de 25.000 habitantes non poida ser unha mesma persoa voceiro do grupo municipal ou alcalde e responsable local da formación.

PACTOS CO PSOE

Na reflexión política achegada polas tres asinantes da emenda ao consello Nacional abórdanse os resultados do BNG nas últimas citas electorais e a situación das formacións políticas.

Ademais de criticar, sen mencionar a formación política, a posición na que quedou Anova nas distintas coalicións nas que participou dende 2012; sitúa o PSOE “en modo gaiola de grilos, mostrando unha incapacidade absoluta, máis alá de feudos e organizacións locais, para elaborar e proxectar unha alternativa consistente para Galicia, característica histórica hoxe profundamente agravada”.

“Só a necesidade imperiosa de frear ao Partido Popular pode xustificar a política de alianzas do BNG co PSOE nos concellos e deputacións, pois, aparte da conciencia que temos na defensa de certos dereitos individuais, no referente ás políticas relativas a Galicia, as diferenzas son case tan profundas como as existentes co PP”, manifestan as tres asinantes da emenda. De feito, o Bloque cogoberna co PSOE en tres das catro deputacións galegas -A Coruña, Lugo e Pontevedra-.

Por outro lado, Da Silva, Riveiro e Vilaverde, que fan no seu texto unha defensa do BNG como “único” proxecto nacionalista, aseguran que o “paciente (o BNG) ten cura e, mesmo, un futuro brillante”. “E se o remedio é unha refundación do BNG parcial ou completa, procedamos; todas as persoas que somos nacionalistas sobre calquera outro aspecto, matiz ou adscrición ideolóxica, teñen cabal cabida nunha mesma organización”, remachan.