Dirixentes do Partido Popular e traballadores de Ence acoden en defensa de Rajoy

Manifestación antes do pleno pontevedrés

Unha hora antes de que o Teatro Principal de Pontevedra abrise as súas portas para acoller a celebración do pleno municipal, ao redor de 400 persoas concentráronse para mostrar a súa postura respecto da declaración como persoa ‘non grata’ do presidente do Goberno en funcións, Mariano Rajoy.

En apoio do titular do Executivo trasladáronse até o lugar dirixentes do PP como a expresidenta do Parlamento Galego e actual deputada, Pilar Rojo, a delegada da Zona Franca de Vigo, Teresa Pedrosa, ou as deputadas Paula Prado e Irene Garrido, ademais de numerosos traballadores de Ence e empresarios de firmas auxiliares da pasteira.

En fronte situáronse membros da Asociación pola Defensa da Ría (APDR), así como outros colectivos ecoloxistas, que están en contra da prórroga por 60 anos para a actual localización de Ence na ría de Pontevedra, que foi decidida polo Goberno en funcións. Así, portaban pancartas alusivas á prórroga da fábrica de celulosas en Lourizán.

INICIATIVA NON APOIADA, SEGUNDO O PP

Pilar Rojo asegurou que máis do 90% dos pontevedreses están en contra da moción pola cal Rajoy será declarado persoa ‘non grata’, que está impulsada polo PSdeG e por Marea de Pontevedra e que recibirá o respaldo do BNG.

“O único que queremos é paz, tolerancia e tranquilidade”, proclamou Pilar Rojo, amiga persoal de Mariano Rajoy, quen tamén reiterou o apoio ao presidente do Goberno “que o único que fixo foi traballar por todos os galegos e todos os españois”.

OS TRABALLADORES DEFENDEN OS SEUS POSTOS

Pola súa banda, o presidente do comité de empresa de Ence, Pedro Soto, xustificou a súa presenza no pleno. “Estaremos alá onde se discuta a legalidade dos nosos traballos”, proclamou e engadiu que os empregos son “parte do debate”.

Soto defendeu a “legalidade” dun proceso que se resolveu administrativamente porque así o permite a Lei de Costas”. “Estaremos en cada foro en defensa do noso dereito a traballar en Pontevedra”, agregou.

POSTURA DOS ECOLOXISTAS

Pola súa banda, o presidente da APDR, Antón MASA, lembrou que os ecoloxistas “sempre” defenderon a ría. “Sempre estivemos en contra dos seus detractores e Rajoy é un deles”, criticou, mentres que puntualizou que os traballadores “están no seu papel” ao defender os seus empregos.

Con todo, criticou aos sindicatos por “non defender os postos de traballo” que ao seu xuízo destrúe Ence coa súa presenza na ría. Ademais, apuntou que a declaración de “persoa non grata” é un xesto “non excesivamente importante”, e limitou o seu carácter a “simbólico”.

Finalmente, asegurou que, coa prórroga, “Rajoy veu darlle unha labazada á cidade de Pontevedra en resposta á labazada que recibiu en Pontevedra da súa propia familia”.

A entrada ao pleno produciuse sen incidentes e o inicio da sesión plenaria apenas se demorou uns minutos, ata que o público gardou silencio.