Catro viguesas participarán nunha expedición polos lagos xeados de Laponia

Presentación da iniciativa

Catro deportistas viguesas, Chus Lago, Estela Estévez, Verónica Romeiro e Silvia Rey, afrontarán este mes de febreiro o reto de atravesar os lagos xeados de Laponia para concienciar sobre os efectos do cambio climático e o quentamento global, todo iso co ollo posto nunha próxima expedición a Groenlandia no ano 2017.

As catro participantes nesta aventura presentaron a iniciativa nunha rolda de prensa este xoves, tan só catro días antes de que arranquen o camiño que as levará a realizar durante 19 días dúas travesías dun total de 200 quilómetros, unha no Lago Inari (Finlandia) e outra no Lago Torneträsk (Suecia).

Neste percorrido, son conscientes de que terán que atravesar un terreo no que se exporán a temperaturas moi baixas -de ata menos 40 graos-, a humidade, malas condicións meteorolóxicas e pouca luz, así como ao factor psicolóxico.

Trátase dunha experiencia coa que pretenden abrir boca de cara a protagonizar en abril de 2017 unha travesía “aínda máis ambiciosa”: Cruzar Groenlandia de sur a norte nun percorrido de 1.300 quilómetros. De novo o obxectivo desta viaxe, para o que todas necesitan experiencia previa no xeo, será apostar pola concienciación sobre o cambio climático, porque “é inminente”.

En relación a iso, a líder do grupo, Chus Lago, comentou que elixiu os lagos xeados de Laponia para a iniciación por que presentan condicións “idóneas”, ao ser similares ás que se atoparán en Groenlandia. “Esta expedición é unha inmersión en toda regra previa a Groenlandia”, apostilou.

AS EXPEDICIONARIAS

Chus Lago destacou que non hai ningún grupo “de mulleres en España que se enfrontaran a este tipo de expedición”. “Non se realizou nunca”, asegurou, antes de ratificar que as catro participantes levan oito meses adestrando para isto.

Segundo indicou, elixiu os seus tres acompañantes para ir con ela nesta viaxe porque buscaba “mulleres con calidades como disciplina, acostumadas ao sufrimento deportivo, que fixesen deporte e teñan xerme de deportistas de elite” e que estean “afeitas a perseguir retos e non os soltar”.

Lago, que ten experiencia previa en rutas pola neve e o xeo, comentou que nesta travesía por Laponia, o obxectivo é que as súas tres compañeiras aprendan a coidarse a si mesmas e mutuamente -a non se conxelar as mans nin os pés, que non lles saian voando as manoplas, non pisar os seus lentes, non caer nun burato- e a guiarse coa axuda de compás, mapas e GPS.

Estas expedicionarias, que pertencen a distintas disciplinas deportivas, definiron esta aventura como “un regalo” e se ben recoñeceron ter “medo”, tamén subliñaron que están a “desexar estar e vivilo”.

PATROCINADORES

En canto ao presuposto para esta expedición, Chus Lago, que financia unha parte, agradeceu a súa participación aos patrocinadores que están detrás, e avanzou que a idea é seguir buscando patrocinadores para asumir os custos.

Así as cousas, recoñeceu que a viaxe de Groenlandia “depende dos patrocinios”, se ben recordou que “todos -os seus- viaxes estiveron pendentes de patrocinios” e finalmente saíron adiante.

A voceiro do Club Montañeiros Celta destacou que este é un reto “moi interesante” que demostra “o que é o deporte”, a súa esencia. Así, destacou que é importante concienciar sobre o medio pero tamén de que “se queres, podes facer algo”, polo que considerou esta experiencia como un “exemplo” para todos.