As bibliotecas municipais de Ourense preparan o Entroido con actividades para os máis pequenos

As Bibliotecas Municipais de San Francisco e da Carballeira adiántanse á celebración do Entroido este xoves 4 e venres 5 de febreiro, respectivamente, con actividades dirixidas aos máis cativos nos seus puntos de animación á lectura. Se no centro de San Francisco levan preparando os seus disfraces para a festa do xoves, o centro da Carballeira celebrará o Entroido por todo o alto en colaboración coas AAVV O Castelo e Carlasca. As actividades son abertas á participación do público, independentemente da idade, e desenvolveranse de 18:00 a 19:30 horas.

Na biblioteca da Carballeira, o venres 5, comezarase cun baile de disfraces e un xogo para decorar as caras. E, logo da merenda saudable, procederase ao concurso de disfraces interxeracional. Neste sentido, establécense tres categorías diferentes: a de 0 a 7 anos, de 8 a 11 e a partir de 12 anos. En cada categoría haberá tres premios diferentes para incentivar a participación.