Adriana Lastra pide que os desacordos entre partidos non frustren as ganas de cambio

A secretaria federal de Política Municipal do PSOE, Adriana Lastra, fixo un chamamento este xoves, en relación coas negociacións para a formación dun Goberno liderado por Pedro Sánchez, para que os desacordos entre partidos “non frustren as ganas de cambio” da sociedade española.

Nun acto con colectivos veciñais, no que presentou as liñas principais do proxecto socialista, Lastra subliñou que o documento elaborado polo seu partido, con corenta medidas encamiñadas a construír un proxecto “de progreso e reformista”, foi valorado “positivamente” polo resto de partidos.

“Hai que buscar o que nos une, non o que nos separa, e mesmo pactar no desacordo. Onde haxa diferenzas de formulación, acantoalas, para que non frustren as ganas de cambio”, proclamou.

A responsable de Política Municipal do PSOE subliñou que os cidadáns, nas pasadas eleccións xerais, decidiron que “se remataran as maiorías absolutas e que non era bo que un goberno usase o rolo parlamentario”. “Era necesario un paso á fronte para intentar un goberno de cambio”, engadiu.

Adriana Lastra sinalou que o seu partido puxo sobre a mesa medidas e actuacións sobre cuestións que necesitan un “cambio urxente” e apuntou que espera sentar con todas as formacións para explicalas, polo que confía en que Podemos poña fin ao “bloqueo na negociación”.

PROXECTO

Lastra defendeu o proxecto de Pedro Sánchez, no que se inclúen medidas para que “a recuperación económica sexa xusta e chegue a todo o mundo”, un pacto pola educación, pola ciencia, medidas de “rexeneración democrática”, de loita contra a violencia de xénero ou de loita contra a corrupción, entre outras.

Con respecto á corrupción, advertiu de que “está a acabar co PP”. “Ou acabamos coa corrupción ou esta acaba coa política”, proclamou, ao tempo que avogou por “institucións transparentes”.

BESTEIRO

No acto con colectivos sociais e veciñais, Adriana Lastra estivo acompañada polo alcalde de Vigo e presidente da FEMP, Abel Caballero; e polo secretario xeral dos socialistas de Galicia, Xosé Ramón Gómez Besteiro, quen puxo en valor a liña de actuación de Pedro Sánchez, “absolutamente coherente” antes das eleccións, despois destas e tras o encargo do Rei para que intente formar goberno.

Gómez Besteiro defendeu que o PSOE busca a “suma de amplos consensos”, que é o que demanda a sociedade española, e apuntou que, neste momento, “hai que entender como se debe facer política”. “A política non quere saber nada neste momento de vetos e inmobilismo, senón de diálogos, de tender pontes e fortalecer o entendemento”, sentenciou.

Así mesmo, subliñou que os socialistas están a “dicir claramente” cáles son as súas “prioridades”: a axenda social, a recuperación económica “xusta”, a loita contra a corrupción, a defensa da educación e o fin da desigualdade.