Actívase a alerta por nevadas do Plan de Viabilidade Invernal en estradas en Lugo, Ourense e Pontevedra

A Delegación do Goberno en Galicia activou na súa fase de alerta o Plan de Vialidade Invernal na Rede de Estradas do Estado das provincias de Lugo, Ourense e Pontevedra. Esta medida adóptase ante as predicións emitidas pola Axencia Estatal de Meteoroloxía por temporal de neve e irase actualizando en función dos partes meteorolóxicos.

En concreto, informou a Delegación do Goberno, segundo as predicións meteorolóxicas, desde este venres e até o sábado pola tarde poderían producirse acumulacións de neve de 20 centímetros nas montañas de Lugo e Ourense.

No centro de Lugo poderían chegar a sete centímetros e no noroeste e sur de Ourense e no interior de Pontevedra a acumulación de neve esta previsto que alcance o seis centímetros. A cota de neve podería descender até os 500 metros.

A Delegación do Goberno en Galicia, de acordo co Protocolo de Coordinación de Actuacións, mobilizará todos os recursos dispoñibles en Galicia para neutralizar os efectos do temporal de frío e neve nas estradas e notificou esta previsión aos organismos implicados en materia de vialidade e tráfico do Estado, así como ao resto de administracións.

O obxectivo fundamental da activación é garantir “a máxima fluidez posible de tráfico” mantendo as infraestruturas de transporte de competencia estatal en condicións de uso, apunta.