A Xunta ten entre as súas premisas mellorar a situación das mulleres rurais

Inauguración das xornadas en Ribadavia

A secretaria xeral da Igualdade, Susana López Abella avanzou hoxe que entre as premisas do goberno galego está mellorar a situación das mulleres rurais, polo que é fundamental entender o seu valor, fomentar a súa visibilidade e impulsar unha igualdade real de oportunidades en materia de acceso e condicións de emprego, impulsar a súa capacidade para emprender e promover condicións que faciliten a conciliación da vida persoal, familiar e laboral nun escenario de corresponsabilidade entre mulleres e homes.

Susana López Abella participou esta mañá na inauguración das Xornadas “Atrévete contigo mesma”, organizadas por Agaca, que tiveron lugar na Cooperativa Galega “Viña Costeira”. (Valdepereira, s/n), é ás que tamén asistiron o presidente de Agaca, José Severino Montes e o presidente da Cooperativa Viña Costeira, Andrés Rodríguez Gómez.

Segundo palabras de López Abella, a finalidade das xornadas son acadar o empoderamento, tanto a nivel persoal como a nivel profesional, das mulleres socias vinculadas a cooperativas para que se animen a participar en ámbitos empresariais públicos, como a cooperativa da que forman parte.
A titular de Igualdade incidiu que hai que ter en conta que nas cooperativas son as mulleres en moitos casos as titulares das explotacións gandeiras, as que traballan e gobernan, e as que deberían participar con voto directo na asemblea da cooperativa, onde se dirimen as decisión empresariais máis importantes e que van afectar plenamente nas súas explotacións gandeiras.

A falta de oportunidades laborais e as dificultades para acceder a servizos de apoio e infraestruturas no medio rural, están na base dos principais problemas aos que se enfrontan as mulleres rurais. Non obstante, estas están particularmente formadas para impulsar e aproveitar os novos depósitos de emprego derivados da multifuncionalidade do medio rural e a súa modernización.

As emprendedoras rurais son exemplo de innovación, creatividade, lograron profesionalizarse e incorporarse ao mercado laboral, á vez que son motor da economía rural. Por iso, hanse de promover novos avances na corresponsabilidade social, que contribúan a deconstruir os vellos estereotipos que aínda perpetúan as desigualdades, pechar as brechas no ámbito laboral e apoiar a capacidade das mulleres para ocupar postos de decisión.