A VII Semana do Cinema Espiritual fará pases por primeira vez para institutos públicos

A VII edición da Semana do Cinema Espiritual, que se celebrará entre o 15 de febreiro e o 18 de marzo nas principais cidades da Comunidade, contará este ano coa novidade de invitar ás súas proxeccións alumnos de institutos públicos.

Estas proxeccións cinematográficas están organizadas pola Igrexa Católica e dirixidas a un público adolescente. Ata a data, só se permitira participar aos colexios de ideoloxía católica, pero nesta ocasión ábrese a que poidan acudir estudantes doutros centros.

O obxectivo desta iniciativa é a promoción entre os adolescentes de “valores humanos importantes e, dentro deles, tamén cristiáns”, segundo explicou o cineasta e asesor do evento, Ángel J. Fernández Prado, nunha rolda de prensa realizada este xoves en Santiago.

En concreto, afirmou que, nesta edición, se proxectarán en centros de ensino de Santiago, A Coruña, Ourense, Pontevedra e Vigo as seguintes películas: ‘Trash. Ladróns de Esperanza’, ‘A canción do mar’ e ‘Maimiño e o espello máxico’.

CAÍDA DE PARTICIPACIÓN

Nesta liña, destacou que, en cada edición, participan entre 2.500 e 2.800 mozos en Galicia, aínda que este ano a inscrición “diminuíu lixeiramente”, algo que achacou máis á falta de vontade dos profesores que á dos alumnos.

A nivel estatal, as proxeccións realízanse dende 2004 e, na actualidade, en 60 sedes. Cada ano establécense as liñas do evento nunha xunta en Madrid.

CONVITE Á “REFLEXIÓN”

Pola súa banda, a asesora pedagóxica de Escolas Católicas de Galicia, Rosario Baleirón, engadiu que cada edición se define baixo un lema que, nesta ocasión, será ‘O sexto sentido, a mirada interior’, unha chamada á “reflexión” e “contemplación” vinculadas ao “amor”.

Así mesmo, Fernández indicou que se realizarán proxeccións especiais en aberto a todos os públicos e non solo alumnos da película ‘The Secret’.

As exhibicións desta “longametraxe de cinema amater espiritual” serán polas tardes. O filme está interpretado por estudantes universitarios e rodado en Galicia, Asturias, Grande Canaria e Turín (Italia) cun presuposto de 10.000 euros e o obxectivo de conseguir “unha mellora nos valores”.

Ao respecto, comunicou que “hai algunhas canles de televisión interesadas” na adquisición do filme, aínda que aínda non se finalizaron as negociacións. Ademais, explicou que a película aínda non está preparada pois a distribuidora esixiu a redución da súa duración das tres horas iniciais a unha hora e media.