Enviar a un amigo
Opinar
ImprimirA evolución de dous modelos fabricados en Vigo favorece que PSA Peugeot Citroën lidere o mercado en xaneiro
O consorcio automobilístico francés PSA Peugeot Citroën pechou o pasado mes de xaneiro cun volume de vendas no mercado español de 2.911 unidades, o que supón un aumento do 17,4% e lle permitiu facerse cunha cota do 27,4%, segundo informa a empresa nun comunicado.
A marca Peugeot matriculou un total de 1.646 vehículos comerciais en España no primeiro mes do ano, o que supón unha penetración do 15,5% e lle serviu para liderar o mercado, mentres que Citroën foi terceira e obtivo unha cota do 11,9%, ata 1.265 unidades.
PSA Peugeot Citroën subliña que estes bos resultados experimentados en xaneiro se explican, en grande parte, pola evolución positiva rexistrada por dous modelos fabricados en España, no centro de Vigo, como son o Peugeot Partner e o Citroën Berlingo.
A corporación gala comercializou 1.320 unidades do Peugeot Partner en España en xaneiro, logrando a primeira posición do mercado e unha cota do 19,9%, mentres que as entregas do Citroën Berlingo, segundo clasificado, se situaron en 945 unidades, cunha penetración do 14,3%.
“MOSTRA DE COMPETITIVIDADE”
O director xeral de Peugeot, Citroën e DS en España e Portugal, Christophe Mandon, afirmou que o liderado de PSA Peugeot Citroën en vehículos comerciais, tanto en vendas coma en produción industrial, “é unha mostra da competitividade do grupo” en España”.
“A confianza de autónomos e empresas está a aumentar e iso reflíctese na venda deste tipo de vehículos. Trátase dun mercado moi esixente, no que os automóbiles son unha ferramenta de traballo, polo que factores como a fiabilidade ou a polivalencia se teñen moi en conta”, finalizou.
