A Consellería do Mar promociona os produtos do mar na feira Fish International de Bremen

A Consellería do Mar está presente na feira Fishing International, que se celebra en Bremen (Alemaña) desde onte, 14 de febreiro ata mañá 16 de febreiro. O director xeral de Pesca, Acuicultura e Innovación Tecnolóxica, Juan Maneiro, visitou esta mañá a feira e realizou un percorrido polas instalacións co obxectivo de difundir os produtos pesqueiros galegos, chegar a novos mercados e ampliar as súas posibilidades de negocio. No evento participan 8 empresas coexpositoras galegas baixo o paraugas da Xunta.

Galicia participa neste evento con dous postos de 60 m² cada un, que dan cabida ás empresas galegas coexpositoras do sector pesqueiro, marisqueiro, acuícola e do ámbito da transformación. O posto da Xunta tamén conta cunha área destinada a centro de negocios, na que as empresas coexpositoras poden manter encontros para ampliar o seu mercado.

Fishing International de Bremen

Esta feira celébrase na cidade alemá cada dous anos. Na edición anterior contou con 230 expositores e con máis de 11.000 visitantes. No encontro, no que se dan cita maioristas, minoristas, importadores, exportadores, industrias elaboradoras, expóñense produtos do mar, deseños de envases, tecnoloxías e servizos do produtor ao consumidor.