A choiva deixa na provincia de Pontevedra numerosas incidencias, rescates e un traslado por ansiedade

As intensas choivas rexistradas nas últimas horas deixaron na provincia de Pontevedra numerosas incidencias, a maioría por inundacións, desbordamentos de ríos e caídas de muros, que obrigaron aos efectivos de emerxencias a auxiliar a varias persoas, unha das cales foi trasladada en ambulancia por un ataque de ansiedade.

Así as cousas, en Poio un muro partiuse na mañá deste venres polo peso da choiva acumulada no monte, co que a auga e a terra viñeron encima de varios chalés, rompendo cristais e entrando ao interior. Como consecuencia, unha persoa tivo que ser trasladada por un ataque de ansiedade, tal e como informou Protección Civil.

En Ponteareas, os efectivos de bombeiros interviñeron nun accidente despois de que se derrubase un noiro na autovía A-52, á altura do quilómetro 270 dirección Ourense. Ademais, o río Tea empezou a desbordarse desde as 4,00 horas deste venres, obrigando a auxiliar a unha persoa para sacar o seu vehículo, que quedara atrancado xunto ao río nunha zona de lodo.

Así mesmo, os bombeiros tiveron que acudir en zódiac a sacar da súa vivenda, que estaba rodeada de auga, a unha persoa que vive xunto ao río e necesitaba acudir ao hospital. Igualmente, tiveron que acceder en zódiac a unha leira na que un cidadán tiña a tres cans en canceiras con peche. Para cando chegaron os efectivos, un dos animais afogora mentres que os outros dous puideron salvarse.

A maiores, os bombeiros de Ponteareas e a Policía Local do municipio tamén tiveron que balizar ríos, cortar o tráfico nalgunhas estradas, sinalizar zonas de perigo e intervir por balsas de auga con risco de accidentes en calzadas, así como por caídas de muros e de árbores.

Por outra banda, a Garda Civil tivo que auxiliar a un veciño de Bueu que se atopaba illado na illa de Ons e necesitaba medicación desde hai varios días, pero non puidera saír da illa debido ao mal tempo -xa que non había transporte regular nin pesqueiros faenando-. Axentes do Instituto Armado recolleron os medicamentos en terra e, a bordo dunha patrulleira do Posto de Marín, dirixíronse á illa, onde lograron atracar para facerllas chegar ao home.

Así mesmo, o mal tempo tamén obrigou a desviar a Santiago de Compostela un voo operado pola aerolínea Iberia, que procedía de Madrid e tiña previsto aterrar no aeroporto vigués de Peinador sobre as 13,00 horas deste venres.

INUNDACIÓNS EN VIGO

En Vigo, o incidente máis relevante ocorreu sobre as 14,00 horas, cando varias persoas resultaron feridas como consecuencia da caída dun muro na rúa Severino Cobas, unha das cales quedou atrapada no seu vehículo. O sucedido obrigou a trasladar en ambulancia a dúas persoas até o Hospital Vithas Nosa Señora de Fátima.

Ademais, na cidade olívica tamén se rexistraron numerosas inundacións, ocasionadas polo desbordamento dun regacho que desemboca no río Lagares -que alagou un viario sen saída- e polo do río na Baixada Salgueira. Igualmente, tivo que ser cortado o Camiño Caramuxo.

OUTRAS INCIDENCIAS

Tamén no Concello de Redondela se desbordou o río Alvedosa, que atravesa o centro urbano do municipio, o que obrigou á Policía Local a cortar varias rúas, entre elas a Avenida Ernestina Otero. Así mesmo, rexistráronse inundacións nalgúns baixos, caídas de ramas ou muros e corremento de terras polas intensas choivas.

Segundo confirmou o alcalde, Javier Bas, todas as cuadrillas municipais e membros de Protección Civil están a actuar, e sinalou que os efectivos se manteñen en alerta, á espera de que se produza, esta tarde, a pleamar.

No Porriño, o desbordamento do río Louro provocou problemas en varias zonas, pero os maiores incidentes rexistráronse na área de Torneiros, onde se cortaron algúns viarios ao tráfico e na zona de Atios. A isto súmanse caídas de árbores e ramas -nalgúns casos, sobre tendido eléctrico-, accidentes de tráfico sen feridos por desprazamento de arquetas, e inundacións de baixos comerciais e casas.

Ademais, o GES Val Miñor atendeu diversas incidencias despois de que no Concello de Gondomar se desbordase o río Miñor, que alagou as pistas de tenis e obrigou a cortar varias rúas tanto no Centro urbano, na rúa Rosalía de Castro, como noutras zonas, como Mañufe.

En Combarro, Protección Civil de Poio tamén tivo que intervir despois de que un regato subterráneo se desbordara, alagando o garaxe dun edificio situado na rúa Maceira e ocasionando danos aos trasteiros e os efectos gardados no seu interior.

OUTRAS PROVINCIAS

Aínda que a choiva afectou de forma particular á provincia de Pontevedra, que se atopa en alerta laranxa, as precipitacións causaron tamén problemas noutros puntos de Galicia.

Así, na provincia de Ourense, o desbordamento nalgúns puntos do río Támega causou inundacións en Verín e Laza, onde a auga corta unha estrada. Tamén o caudal do Sil alagou distintas zonas na Rúa e O Barco.

En Ourense cidade está activada a prealerta polo nivel do río Miño. Ante o risco de que se desborde, o Concello decidiu pechar as áreas termais próximas ao río e Protección Civil mantén balizas de protección nas zonas máis baixas da canle. O consistorio pediu aos cidadáns que non paseen por zonas próximas ao Miño.

Finalmente, os concellos de Neda, onde algúns camiños xa están cortados pola auga, e Fene activaron a alerta por choiva á espera de que esta tarde chegue a pleamar, ante o risco de que se poidan alagar varias zonas.