A Audiencia de Lugo avala o estudo das contas de Besteiro no Garañón

A Audiencia Provincial de Lugo desestimou o recurso de apelación presentado pola defensa do secretario xeral do PSdeG, José Ramón Gómez Besteiro, tras a petición da xuíza Pilar de Lara o pasado mes de outubro de ampliar a investigación sobre o patrimonio e as contas bancarias do político socialista.

Nun auto con data do pasado mércores, a Audiencia Provincial cualifica de “certamente exhaustivo” a análise patrimonial do líder do PSdeG, pero sostén que iso non pode levar a cualificalo de “improcedente”.

“O transcurso do tempo (é) o que marcará o maior ou menor acerto e eficacia da práctica de tales dilixencias de investigación”, esgrime o alto tribunal lucense, á vez que chama a atención sobre que “a natureza dos presuntos feitos investigados” fai “razoable” esa “exhaustividade”.

En concreto, o expresidente da Deputación de Lugo está a ser investigado por supostos delitos de tráfico de influencias, suborno, prevaricación e contra a ordenación do territorio no marco do caso Garañón.

No que incumbe á proba en si, que xa foi practicada, a Garda Civil analizou as contas bancarias de Besteiro e as da súa esposa entre o 1 de xaneiro de 2004 e o 31 de decembro de 2013 sen apreciar irregularidades ou “información relevante” sobre a investigación que dirixe Pilar de Lara.

Por último, a Audiencia Provincial de Lugo advirte no seu escrito que “o tempo transcorrido” desde o inicio da investigación sobre Besteiro fai “conveniente” que se conclúan” as dilixencias abertas.