Vellos Tempos prepara un Entroido marcado pola reciclaxe
As lonas publicitarias do Concello do Grove terán un fin máis lúdico este mes de xaneiro. Os materiais desbotados que se almacenaban no Concello serán reempregados polos monitores e usuarios de Vellos Tempos confeccionando disfraces que teñen nese material o seu elemento principal. Trátase de lonas plastificadas impresas que habitualmente son empregadas en sistemas publicitarios móbiles ou pendurados na fachada do Concello e que, unha vez rematadas as actividades para as que son realizadas, teñen unha complexa reciclaxe ao tratarse de materiais téxtiles con alto compoñente químico.
A actividade de Vellos Tempos permite así darlle unha mellor vida a estes elementos. Tanto é así que o material recollido será obxecto non só de elaboración de disfraces, senón que nas vindeiras semanas permitirá realizar un obradoiro de confección de bolsos. Mentres, as monitoras de Vellos Tempos gardan o segredo sobre o motivo dos disfraces que os maiores lucirán nas datas de Entroido.