Un menor foi detido en Vigo tras empuxar, ameazar e insultar á súa nai e á parella dela por non regalarlle un móbil

Axentes da Policía Local de Vigo detiveron a un menor de 16 anos de idade, por un suposto delito de violencia no ámbito familiar, tras empuxar, ameazar e insultar á súa nai e ao seu padrasto por non regalarlle un móbil. Segundo informaron fontes policiais, os feitos tiveron lugar na tarde do mércores nun domicilio da rúa Pi e Margall. Un veciño do edificio chamou á Policía ao escoitar berros e golpes procedentes dun dos pisos e, cando chegaron aos axentes, confirmoulles que non era a primeira vez que se escoitaban discusións.

Cando os policías chamaron ao piso, abriulles a porta a nai de familia que, en estado moi nervioso e entre saloucos, permitiulles entrar ao domicilio. Alí, os axentes comprobaron que había aveños tirados pola casa, varios cadros rotos e un mozo co torso espido, moi alterado, gritando e golpeando as paredes.

A muller explicou aos policías que iniciara unha discusión co seu fillo porque este reprochoulle que non lle regalaron un teléfono móbil. Cando a nai e a súa parella lle dixeron que non tiñan medios económicos para facerlle ese agasallo, o mozo púxose agresivo, comezou a romper cousas e chegou a empuxalos.

A señora tamén explicou que o seu fillo lles esixe diñeiro “constantemente” e que as discusións son frecuentes, así como que ten “medo” do menor, que xa estivo ingresado nun centro hai dous anos polo seu carácter conflitivo. Ante estes feitos, os axentes procederon á detención do xoven.