Santos Héctor di que as súas actuacións “foron impecables e con respecto á lei”

O edil vigués de Emprego e secretario provincial do PSdeG en Pontevedra, Santos Héctor Rodríguez, trasladou a súa “total colaboración” coa xustiza na causa na que está sendo investigado e defendeu que as súas actuacións “sempre foron impecables e con escrupuloso respecto á lei”.

Así o comunicou este mércores en declaracións aos medios, na primeira vez que comparece publicamente dende que o luns transcendeu que é investigado pola xuíza de Instrución número sete de Vigo en relación coa causa que investiga o suposto ‘enchufe’ da cuñada de Carmela Silva nunha contrata do Concello olívico.

Santos Héctor ratificou que este martes recibiu a citación xudicial para comparecer ante a xuíza o próximo 23 de febreiro pero aínda non dispón do auto. Non obstante, incidiu en que “sen auto ou con auto” presta a súa “total colaboración” coa xustiza para “esclarecer os feitos”.

O concelleiro socialista deberá acudir ao xulgado o próximo 23 de febreiro ás 10,00 horas para aclarar a súa responsabilidade na autorización dunha serie de contratos en favor da empresa Imesapi que, segundo sospeita a instrución, tiñan como finalidade compensar á devandita empresa pola contratación de Vanessa F.B., cuñada da concelleiro e presidenta da Deputación, Carmela Silva.

Neste procedemento tamén están sendo investigados a propia Vanessa F.B., así como o xefe de área de Participación Ciudadana e Emprego, Francisco J.G.O. Pola súa parte, respecto ao interventor e ao seu predecesor imputados, acordouse o sobresemento provisional.