Os de Monterrei serán os viños oficiais da Feira do Cocido de Lalín

Por quinto ano consecutivo, os viños da Denominación de Orixe Monterrei serán os que sirvan oficialmente na Feira do Cocido de Lalín, cuxo día grande se celebrará o próximo 31 de xaneiro. Así, este domingo terá lugar o denominado Cocido Solidario promovido polo Concello de Lalín, iniciativa que substitúe á comida oficial que viña celebrándose tradicionalmente e na que participará a presidenta da D.O Monterrei, Asunción Rodríguez.

Grazas a esta colaboración, os comensais que participen no Cocido Solidario poderán gozar de diferentes viños de Monterrei, que serán servidos (a diferenza doutros anos) baixo etiqueta xenérica. A presidenta da D.O de Monterrei valora o impacto desta acción promocional como “tremendamente positivo” para os viños da zona, posto que “as previsións de visitantes” que manexa o Concello de Lalín nestas datas, “superan as 70.000 persoas”.

De feito, articulouse un completo programa de actos desde o Concello con diferentes accións ao longo dos próximos días, entre as que se inclúen o Cocido dos Maiores ou o Cocido LGTB. 

Sobre a D.O. Monterrei

A de Monterrei é unha ds cinco denominacións de orixe vinícolas galegas. Confórmana 24 adegas do val de Monterrei, que abarca os municipios de Verín, Monterrei, Vilardevós, Ríos, Oimbra e Castrelo do Val. Os viñedos desta D.O ocupan un total de 531 hectáreas de territorio nas que traballan 445 viticultores.