Os comerciantes estiman que a tractorada de Lugo baixou as vendas entre un 10% e un 15%

O presidente da Federación Galega do Comercio, José María Seijas, calculou que o impacto económico nas vendas do comercio de Lugo pola tractorada de Agromuralla se situou “entre un dez e un quince por cento”.

Así o explicou despois de que o pasado venres os gandeiros levantasen a tractorada que mantiña cercada a Muralla romana dende había máis dun mes.

“Cando un vai comprar quere comodidade, quere que haxa aparcamento, quere todo o que faltou este Nadal”, queixouse Seijas, que durante os últimos días reiterou os prexuízos causados ao comercio por esta acción.

José María Seijas afirmou que “sente” esta situación, dado que o lácteo é “un sector que hai que defender porque é moi importante para a provincia”. “Pero creo que hai que buscar outros métodos, porque isto tampouco é favorable para eles”, explicou.