O proxecto de presupostos de Santiago sobe en benestar e baixa en publicidade e protocolo

O borrador de presupostos do Concello de Santiago presentado polo goberno local, de Compostela Aberta, recolle un incremento do 20 por cento na área de benestar social e elimina uns 700.000 euros en gastos relacionados con publicidade e protocolo.

Concretamente, o proxecto presupostario inclúe 99,45 millóns de euros, unha cifra en torno a 2 millóns por debaixo da actual pero que, en palabras da concelleira responsable de Facenda, María Rozas, é “máis realista” en canto a ingresos e gastos. A idea é recorrer a unha débeda duns 5 millóns.

O documento presupostario foi presentado aos medios despois de que o goberno local mantivese un contacto cos grupos da oposición en Raxoi e ás achegas da cal están abertos. Iso si, o goberno local transmitiulles que se aspiran a aumentar o presuposto, acheguen tamén a orixe desas partidas, xa que a idea non é “variar demasiado o importe global”.

En declaracións aos medios previas, o alcalde de Santiago, Martiño Noriega, manifestou que é un anteproxecto “moi traballado” e que ten “vontade de introducir variacións”. “O que transmitimos aos grupos é que non é un documento pechado, porque se non, non poderiamos negocialo, evidentemente haberá que explicar a semanas de diálogo”, manifestou o rexedor compostelano, quen se implicará persoalmente no proceso.

A esencia das contas, explicou, é “apostar polo reequilibrio da cidade” e o aumento do gasto social, ao tempo que “diminuír” os gastos de protocolo e publicidade, e “cumprir” cos compromisos dos traballadores do concello. Ademais, tamén se “incrementan” as políticas de emprego.

PRESUPOSTO PARA PERSOAL

Precisamente, no capítulo de persoal, o goberno local presupostou 30.092.969 millóns de euros, unha cifra na que “non hai unha diferenza moi importante” con respecto ao ano anterior. Non obstante, si reordenou a contía, de maneira que agora se eliminan 900.000 euros presupostados para vacantes que non se poden cubrir, que se “compensan” cos 670.000 euros para pagar a paga extra de 2012, a suba do 1 por cento das nóminas e 150.000 euros para o fondo de axuda de acción social.

Os gastos correntes ascenden a 38.275.381 euros, cunha redución de 700.000 euros en protocolo e publicidade, mentres que aumenta a previsión para amortización da débeda ao pasar de máis de 6 a 9,1 millóns, xa que vén dado do ano anterior.

No capítulo dos investimentos, inclúense 6,5 millóns de euros. Entre outras, destaca a reserva de presuposto para a expropiación dos terreos para executar a estación intermodal en Santiago.

A concelleira destacou outras actuacións previstas, como varias obras e a multiplicación por dous da inversión nas parroquias do rural compostelano, para o arranxo de rúas, iluminación e asfaltado de pistas, entre outras cuestións que mencionou e en liña coa aposta polo “reequilibrio” do municipio.

O goberno local tamén pretende iniciar con estes presupostos un plan plurianual, que se estenderá toda a lexislatura, para a reforma das áreas de xogo de 16 os centros de educación de infantil e primaria. Para 2016, están previstas reformas en catro centros.

No ámbito social, o goberno local prevé abrir a Casa das Mulleres, na antiga sede de Emuvissa; incrementar as bolsas para comedores sociais (con 200.000 euros) e realizar plans de igualdade. O goberno local prevé unha bolsa social de 1,5 millóns de euros.

O goberno local mantén proxectos plurianuais como a Smart Iago se mantén, pero recordou que non se fixera “nada” e que a previsión que tiña o anterior goberno (1,5 millóns) significaba que a Unión Europea pagaba o 100 por cento do proxecto, malia o que non é así, explicou María Rozas.

“SORPRESA”

No capítulo de transferencias correntes hai un descenso que María Rozas explicou, en parte, pola “sorpresa” de atopar unha “duplicidade” dun ingreso que a contabilizada dúas veces nos presupostos dende 2014 e que ascende a dous millóns de euros. Segundo explicou, tras comunicarse co Ministerio de Fomento, argumentóuselle que tiña que ser “un erro” desas contas e, polo tanto, eliminouse.

Tamén nos ingresos se eliminou a venda de terreos que previra o goberno anterior para o ano pasado e que, en todo caso, non se levou a cabo, e redúcense os impostos directos, derivado das ordenanzas fiscais (a redución do IBI aprobada por PSOE e PP) e as bonificacións do imposto sobre vehículos. De impostos directos, o goberno local presuposta recadar 40,5 millóns de euros.

O goberno local tamén reservou 300.000 euros para a instalación de ascensores en edificios residenciais de barrios desfavorecidos; e 17.550 euros para obras de acondicionamento dunha zona de descanso para peregrinos, parque público e parque infantil en Angrois; a recuperación do campus sur e a humanización viaria.