O Pleno de Vigo acorda esixir á concesionaria Linorsa que pague ás limpadoras e abriráselle expediente se non o fai

O Pleno do Concello de Vigo, reunido este luns en sesión ordinaria, aprobou por unanimidade unha moción da Marea para esixir á concesionaria de limpeza de instalacións municipais e colexios, Linorsa, que cumpra o prego de condicións en materia laboral e fiscal, e pague ás súas empregadas o que lles debe.

O voceiro de Marea de Vigo, Rubén Pérez, preguntouse “por que se meten recursos públicos nun saco sen fondo”, en alusión ás débedas de Linorsa, non só co equipo, senón tamén coas administracións públicas. Tamén se interrogou acerca de “quen controla” esa concesionaria, que se adxudicou o servizo nos últimos anos e que mesmo se beneficiou dunha prórroga.

Pérez reclamou “que se abra xa o debate para rescindir o contrato e que se dea solución inmediata aos traballadores”, ao tempo que apuntou, como unha “boa solución”, a “remunicipalización” deste servizo de limpeza.

Por outra banda, criticou que o goberno municipal prorrogara a concesión a Linorsa malia os seus problemas, xa que “non había causa algunha” que xustificase esa prórroga.

EXPEDIENTE SANCIONADOR

Por parte do goberno municipal, o edil David Regades, proclamou que a administración local está “do lado dos traballadores” e que solicitou un informe xurídico, no que se manifesta a obriga da empresa de asumir as súas obrigas laborais.

Ese informe foi remitido á empresa nunha carta con data 18 de xaneiro, na que se lle require para que “de inmediato” cumpra con esas obrigas, e lle advirte de que, transcorridos 15 días sen atender ese requirimento, “se procederá a iniciar o regulamentario expediente sancionador”.

Segundo Regades, o goberno local “vai exercer toda a súa potestade” para obrigar á empresa a pagar aos traballadores, aínda que advertiu de que unha rescisión precipitada do contrato pode prexudicar precisamente aos empregados.

Varias decenas de traballadoras de Linorsa levaron este luns as súas protestas ao Pleno, e interromperon a sesión en varias ocasións, ao berro de “¡Queremos cobrar!” , “¿Por que prorrogastes o contrato?” ou “¿Onde está o diñeiro público?”.