O Partido Popular lamenta que AGE “entorpeza a solución” para Vigo na Lei do Solo

O voceiro parlamentario do PPdeG, Pedro Puy, lamentou este luns que AGE decidira “obstaculizar” a introdución dunha cláusula na nova Lei do Solo, actualmente no trámite de relatorio parlamentario, para solucionar a situación urbanística de Vigo despois de que o Tribunal Supremo anulase o seu plan. “Non entendo que se gaña entorpecendo a solución”, remarcou, ao tempo que sinalou que existen “outras vías” que se poden utilizar.

Preguntado sobre este asunto en rolda de prensa, o dirixente popular fixo fincapé en que a emenda formulada ten o apoio do PSdeG -que lidera a cidade olívica- e en que, ademais, só o grupo de AGE se opuxo á súa introdución. “Non o vemos razoable”, engadiu.

Ao estar pechado o prazo para a presentación de emendas á Lei do Solo cando se produciu a anulación do PXOM vigués, a única fórmula para buscar un acomodo legal a diferentes proxectos en marcha na cidade (como a ampliación de Citroën) pasaba por introducir unha emenda técnica, o que require a conformidade de todos os grupos -independentemente do que posteriormente voten sobre o texto-. Non obstante, Alternativa non aceptou que se introducise a emenda do PP.

Neste escenario, Puy Fraga preferiu non descartar polo momento que o grupo liderado por Xosé Manuel Beiras acabe aceptando que se incorpore esa solución, pero advertiu de que se a súa negativa “persiste” tomarán outras decisións para que “prevaleza o interese xeral”. Polo tanto, resaltou, “tranquilidade absoluta” sobre que o problema de Vigo “será solucionado”.

Entre os “distintos mecanismos” que barallan os populares, como comentou o deputado, está reformar de novo a Lei do Solo unha vez aprobada. Sexa cual sexa a opción que finalmente se decida, resolverá a situación, segundo Puy, nun “prazo de tempo breve e razoable”.

PRESIDENCIA DO PARLAMENTO

Xunto coa reforma da Lei do Solo, outra cuestión pendente de resolver é quen asumirá a Presidencia do Parlamento tras a marcha de Pilar Rojo ao Congreso dos Deputados.

Polo momento, dixo Pedro Puy, a decisión non está pechada e o prazo non conclúe ata o próximo día 26, cando arranca o primeiro pleno deste período de sesións.

Nesa xornada plenaria, como avanzou, tomarán posesión do seu escano tanto a substituta de Rojo, a concelleira viguesa Elena González; como a seguinte na lista do PP por A Coruña, Sandra Devesa, de Oleiros, que entra tras a marcha de Paula Prado ao Senado.

Así mesmo, deu por feito que se debaterá unha iniciativa lexislativa popular contra a pobreza enerxética e o proxecto de Lei de Patrimonio Cultural de Galicia.

CANDIDATO DO PPDEG

Outro asunto sobre o que foi cuestionado Pedro Puy é o futuro de Feijóo, ao que recordou, a preguntas dos xornalistas, que en breve haberá un congreso no que se decidirá quen se fará coas rendas do partido e concorrerá como cabeza de cartel do PPdeG ás eleccións autonómicas.

Sen querer entrar en “interpretacións”, unicamente resaltou que Feijóo sería “o mellor candidato” que podería saír dese conclave.